بینگن کھانے سے صحت پر کیا فرق پڑتا ہے؟

بینگن ایک ایسی سبزی ہے جسے بہت کم لوگ پسند کرتے ہیں اور اس کی افادیت سے متعلق بھی بہت کم لوگ ہی جانتے ہیں اسی لیے اسے نظر انداز کیا جاتا ہے جبکہ بینگن میں  کیلوریز کم اور قُدرتی غذائی اجزا جیسے کہ فائبر، وٹامنز اور معدنیات کی تعداد کثرت سے پائی جاتی ہے۔

ایشائی ممالک سمیت دنیا بھر میں بینگن کی سبزی کھائی جاتی ہے، مغربی ممالک میں اِسے زیادہ تر بھون کر کھایا جاتا ہے، بینگن کو خوبصورتی بڑھانے والی سبزی بھی کہا جا سکتا ہے جبکہ پاکستان میں بینگن کو آلو، اروی، گوشت یا اس کا بھرتہ اور رائتہ وغیرہ بنا کر استعمال کیا جاتا ہے، یہ سبزی 12 مہینے دستیاب ہوتی ہے، اس کی دو اقسام ہیں جن میں  سے ایک گول اور ایک لمبی قسم ہے۔

بینگن بے شمار غذائی اجزا اور اینٹی آکسیڈنٹ خصوصیات سے مالامال سبزی ہے، بینگن میں بہت سی بیماریوں سے لڑنے کی خصوصیات موجود ہیں جبکہ یہ کینسر جیسے جان لیوا مرض سے بچاؤ کے ساتھ دیگر بیماریوں سے بھی محفوظ رکھتی ہے۔

غذائی ماہرین کے مطابق بینگن میں فاسفورس، آئرن، وٹامن اے، بی اور سی، وٹامن بی1، بی 6، پوٹاشیم، میگنیشیم، فولک ایسڈ اور ڈائٹری فائبر پایا جاتا ہے ، یہ سبزی بلند فشار خون اور تناؤ میں کمی اور ذیابطیس کے مرض کو قابو  کرنے میں مددگار ثابت ہوتی ہے ۔

بینگن کے استعمال کے نتیجے میں صحت پر آنے والے بے شمار مثبت فوائد جان کر آپ بھی اس سبزی کو اپنی غذا کا حصہ بنانے پر یقیناً مجبور ہو جائیں گے۔

بینگن کولیسٹرول کے خاتمے کے لیے مفید ہے

بینگن میں فائبر وافر مقدار میں موجود ہوتا ہے جو کولیسٹرول کی سطح کو برقرار رکھنے میں مدد کرتا ہے، تحقیق کے مطابق بینگن میں موجود اینٹی آکسیڈنٹ اور کلورجینک ایسڈ کولیسٹرل کی سطح کو کم کرنے میں مدد کرتا ہے اور اِس کے علاوہ جگر کے مرض کے خطرے کو بھی کم کرتا ہے، کولیسٹرول کے مریضوں کو طبی ماہرین کی جانب سے غذا میں بینگن کا زیادہ سے زیادہ استعمال تجویز کیا جاتا ہے۔

امراض قلب کے مریضوں کے لیے مفید

بینگن امراضِ قلب سے بچنے کے لیے بھی بہت مفید ہوتا ہے، بینگن میں پائے جانے والے فائبر، وٹامن سی، وٹامن بی، پوٹاشیم اور دیگر اینٹی آکسیڈنٹ دِل کی بیماریوں کے خطرے سے بچنے کی صلاحیت رکھتے ہیں، تحقیق کے مطابق بینگن دِل کے نظام کو بہتر بناتا ہے اور اِس کے علاوہ کولیسٹرول کی بڑھتی ہوئی سطح کو بھی کم کرتا ہے، لہٰذا دِل کی بیماریوں سے محفوظ رہنا چاہتے ہیں تو غذا میں بینگن کو لازمی شامل کریں۔

بلغم کا بہترین علاج

بلغم کی شکایت رکھنے والے افراد کے لیے بینگن کا سالن مفید غذا ہے، بینگن بلغم کا دشمن قرار دیا جاتا ہے۔

شوگر لیول متوازن بناتا ہے

بینگن میں فائبر اور پولیفینول بھرپور مقدار میں پائے جاتے ہیں، یہ دونوں بلڈ شوگر کی سطح کو کم کرنے میں مددگار ثابت ہوتے ہیں، بینگن کو شوگر کے مریضوں کے لیے ایک صحت مند غذا سمجھا جاتا ہے لہٰذا شوگر کے مریضوں کو اپنی غذا میں بینگن کا استعمال ضرور کرنا چاہیے۔

کینسر سے بچاؤ کے لیے مفید سبزی

بینگن میں کینسر سے بچاؤ کی خصوصیات بھی موجود ہوتی ہیں، بینگن جسم کو کینسر جیسے جان لیوا مرض سے بچاتا ہے اور اگر کسی کو کینسر کا مرض لاحق ہو جائے تو ایسی صورت میں یہ سبزی مرض کی دوبارہ نشونما بھی روکتی ہے۔

قبض کشا

بینگن قبض کشا سبزی ہے، یہ معدہ میں گیس اور تیزابیت کو دور کرتی ہے، بینگن معدے کی رطوبتوں کے اخراج میں مدد دیتا ہے لہٰذا بینگن کے استعمال سے بھوک میں اضافہ ہوتا ہے۔

بینگن سے متعلق احتیاطی تدابیر

غذائی ماہرین کے مطابق بینگن پیشاب آور سبزی ہے اور اس کا زیادہ استعمال خون میں گرمی پیدا کرتا ہے۔

غذائی ماہرین کے مطابق جن لوگوں کو جسم میں خشکی ہو، نیند کم آتی ہو اور بواسیر کی شکایت ہو ایسے افراد کو بینگن کی سبزی ہرگز غذا میں شامل نہیں کرنی چاہیے۔

غذائی ماہرین کی جانب سے بینگن کا استعمال ہر قسم کے بخار میں بھی سختی سے منع کیا جاتا ہے۔

بشکریہ جنگ