صاف پانی کیس میں بلایا گیا اور گندے نالے کیس میں گرفتار کیا گیا: شہباز شریف

مسلم لیگ ن کے صدر شہباز شریف کا کہنا ہے کہ مجھے صاف پانی کیس میں بلایا گیا اور گندے نالے کیس میں گرفتار کیا گیا۔

سابق وزیرِ اعظم شہباز شریف رمضان شوگر مل ریفرنس میں لاہور کی احتساب عدالت کے روبرو پیش ہوئے۔

مسلم لیگ ن کے صدر شہباز شریف نے مقدمے میں عدالت کے سامنے گندا نالہ کیس میں حقائق و شواہد پیش کیے اور سیاسی انتقام کا حوالہ دیا جبکہ قومی خزانے کی بچت کی اپنی کارکردگی کے واقعات پیش کیے۔

احتساب عدالت نے نیب ریفرنس میں شہباز شریف کو طلب کیا تھا۔

مسلم لیگ ن کے صدر کی پیشی کے موقع پر عدالت کے اطراف سیکیورٹی کے سخت انتظامات کیے گئے تھے۔

مسلم لیگ ن کے صدر شہباز شریف کا کہنا ہے کہ لیول پلیئنگ فیلڈ یہ ہے کہ نواز شریف اسلام آباد کی عدالت میں پیش ہو رہے ہیں اور میں انصاف کے لیے لاہور کی عدالت میں پیش ہوا۔

شہباز شریف نے روسٹرم پر آ کر کہا کہ میں کیس کے میرٹ پر گفتگو نہیں کروں گا وہ میرا وکیل کرے گا، یہ مقدمہ بہت سال سے چل رہا ہے۔

انہوں نے کہا کہ مجھے پہلی بار صاف پانی میں بلوایا گیا اور گرفتار آشیانہ میں کیا، اللّٰہ تعالیٰ کا شکر ہے کہ آشیانہ کیس میں بریت ہوئی، آشیانہ اقبال میں مجھے آپ کی عدالت نے انصاف دیا، بہت شکر گزار ہوں کہ مجھے یہاں سے انصاف ملا، اس کے بعد نیب نے مجھے گندے نالے کیس میں گرفتار کیا، مجھے کہا گیا کہ بیٹے کی شوگر مل کے باہر گندا نالا تعمیر کروایا ہے۔

سابق وزیرِ اعظم نے کہا کہ یہ گندا نالا ایک ایم پی اے نے تعمیر کرایا، میرے دور میں صاف پانی کے ہزاروں پروجیکٹ لگائے، یہ مل ہماری وراثتی شوگر مل ہے وہ میں نے بیٹے کو ٹرانسفر کر دی ہے۔

عدالت نے شہباز شریف کو جانے کی اجازت دیتے ہوئے کیس کی سماعت 12 دسمبر تک ملتوی کر دی۔

بشکریہ جنگ