اسرائیلی فوج نے ٹینکوں کے غزہ میں داخل ہونے کی ویڈیو جاری کردی

اسرائیل نے غزہ پر تین اطرف سے حملہ کردیا، جس کے دوران طیاروں، بحری جنگی جہازوں سے بمباری اور ٹینکوں سے گولا باری کی گئی۔

غزہ کی پٹی دھماکوں سے گونج اٹھی، ہر جانب دھویں کے بادل اٹھتے نظر آئے اسرائیلی فوج نے ٹینکوں کے ذریعے غزہ میں داخل ہونے کی ویڈیو بھی جاری کردی۔

اسرائیلی فوج کی جانب سے شمالی غزہ میں 150 اہداف کو نشانہ بنانے اور حماس کے فضائی آپریشن کے سربراہ اور کئی کارکنوں کو شہید کرنے کا دعویٰ بھی کیا گیا ہے۔

مسجد سے دیے گئے پیغام میں کہا گیا کہ ہم اللّٰہ کی قدرت کو ان پر غالب سمجھتے ہیں۔

دوسری جانب حماس کا کہنا ہے کہ غزہ پر اسرائیلی فوج کا 3 طرفہ حملہ ناکام بنا دیا، بھاری نقصان پہنچایا، دشمن کئی محاذوں پر فلسطینی مزاحمت کے جال میں پھنس گیا۔

فلسطینی مزاحمتی تحریک حماس کا کہنا ہے کہ اسرائیلی حملے پسپا کرنے کے لیے روسی ساختہ ٹینک شکن میزائل اور مقامی طور پر تیار یاسین میزائل استعمال کیے گئے۔

اسرائیلی فوج کی بمباری کی وجہ سے بے گھر ہونے والے مظلوم فلسطینی بچے کی روتے ہوئے ویڈیو نے دیکھنے والوں کو بھی دکھی کردیا ہے۔

حماس کا کہنا ہے کہ غزہ کی سرزمین اسرائیلی فوجیوں کی باقیات نگل جائے گی۔

فلسطینی وزارت صحت کا کہنا ہے کہ غزہ پر اسرائیلی حملوں میں شہید فلسطینیوں کی تعداد 7 ہزار 703 ہوگئی، شہید فلسطینیوں میں 3 ہزار 595 بچے شامل ہیں۔

فلسطینی وزارت صحت کا کہنا ہے کہ اسرائیلی فوج نے 7 اکتوبر سے اب تک 825  فلسطینی خاندانوں کا اجتماعی قتل عام کیا، 53 فلسطینی خاندانوں کو گزشتہ شب کی گئی وحشیانہ بمباری کے دوران شہید کیا گیا۔

بشکریہ جنگ