الیکشن کمیشن عملہ اغوا کرنے والوں کو عبرتناک سزادی جائے، مریم اورنگزیب

پاکستان مسلم لیگ ن کی ترجمان مریم اورنگزیب کا مطالبہ کرتے ہوئے کہنا ہے کہ الیکشن کمیشن کے عملے کو اغوا کرنے والوں کو عبرتناک سزا دی جائے۔

مریم اورنگزیب نے اپنے بیان میں کہا ہے کہ این اے 75 میں ریاستی دہشتگردی کی گئی، الیکشن کمیشن رپورٹ کے مطابق بیس پریزائڈنگ افسران کو اغوا کر کے مشکوک جگہ پر لے جایا گیا، سوال ہے پریزائیڈنگ افسران کو کس نے اور کیوں اغوا کیا۔

مسلم لیگ نون کے رہ نما رانا ثناء اللّٰہ کہتے ہیں کہ ہمارا مطالبہ ہے کہ پورے حلقے این اے 75 میں ری پولنگ کرائی جائے۔

مریم اورنگزیب نے کہا ہے کہ سوال اٹھتا ہے یہ مشکوک اور مخصوص جگہ کس کی تھی جہاں پریزائیڈنگ افسران کو رکھا گیا، الیکشن کو متنازعہ بنایا اور ووٹ چوری کیے اور ووٹوں میں تبدیلی کی گئی۔

انہوں نے مزید کہا کہ  پاکستان کی تاریخ میں ایسا متنازع اور بھیانک الیکشن نہیں ہوا، یہ محض ڈسکہ ری پولنگ کی بات نہیں بلکہ الیکشن کمیشن کے اختیارات اور ڈیٹرنس کی بات ہے۔

پریزائیڈنگ افسر کو لقمے ملتے رہے کہ کیا کہنا ہے؟ مبینہ طور پرووٹوں کا تھیلا لے کر فرار کے دوران پکڑے گئے پریزائڈنگ افسر نےاپنا نام لیاقت علی بُھٹہ بتایا۔

مریم اورنگزیب کا کہنا تھا کہ آٹا، چینی، دوائی چور عوامی میدان سے بھاگ گئے ہیں، عوامی میدان سے انہیں ووٹ کے ذریعے بھگایا گیا ہے۔

مریم اورنگزیب نے کہا ہے کہ آنے والا ہر الیکشن یہ پیغام دے گا تم مسترد شدہ سیلیکٹڈ اور کٹھ پتلی ہو۔

بشکریہ جنگ