سعید غنی، حافظ نعیم الرحمان ملاقات کی تفصیلات سامنے آگئیں

کراچی میں بلدیاتی انتخابات کے بعد میئر کراچی کیلئے سیاسی رابطوں کا آغاز ہوگیا۔ سعید غنی اور حافظ نعیم الرحمان کے درمیان ملاقات کی تفصیلات سامنے آگئیں۔

ذرائع کے مطابق پیپلز پارٹی کے وفد نے میئر کراچی کے عہدے کیلئے جماعت اسلامی سے بات کی۔

جماعت اسلامی نے کہا کہ میئر سے پہلے نتائج تبدیل کیے جانے پر بات کی جائے، آر اوز اور ڈی آر اوز صورتحال خراب کر رہے ہیں۔

ذرائع کے مطابق جماعت اسلامی کا موقف ہے کہ آر اوز اور ڈی آر اوز سندھ حکومت کے افسران ہیں، یہ سندھ حکومت کی ہدایت پر نتائج تبدیل کر رہے ہیں۔

ذرائع نے بتایا کہ سعید غنی نے دوران ملاقات فون کرکے دوبارہ گنتی کی درخواستیں روکنے کی ہدایت کی۔

ذرائع کا کہنا ہے کہ ملاقات کے بعد بعض حلقوں میں دوبارہ گنتی رُکنے کی اطلاع ہے، پیپلز پارٹی نے کئی حلقوں میں دوبارہ گنتی کی درخواست دے رکھی ہے۔

ذرائع کے مطابق آئندہ ملاقات میں میئر کراچی کے معاملے پر بات ہوسکتی ہے۔

حافظ نعیم الرحمان نے کہا کہ پی ٹی آئی کی قیادت سے فون پر بات ہوئی، براہ راست ملاقات نہیں ہوئی لیکن براہ راست ملاقات جلد متوقع ہے۔

بشکریہ جنگ