گیلانی کے وکیل سے نااہلی درخواست پر جواب طلب
الیکشن کمیشن میں یوسف رضا گیلانی کے خلاف نااہلی کی درخواست پر الیکشن کمیشن نے یوسف رضا گیلانی کے وکیل سے آئندہ سماعت پر جواب طلب کرلیا۔
ممبر پنجاب الطاف ابراہیم قریشی کی سربراہی میں 4 رکنی کمیشن نے یوسف رضا گیلانی کی بطور سینیٹر نااہلی معاملے پر کیس کی سماعت کی۔
سماعت کے دوران الیکشن کمیشن میں یوسف رضا گیلانی اور علی حیدر گیلانی کے وکلاء پیش ہوئے، جبکہ تحریک انصاف (پی ٹی آئی )کے اراکین اسمبلی فرخ حبیب اور ملیکہ بخاری پیش ہوئے۔
پی ٹی آئی نے الیکشن کمیشن میں ترمیم شدہ درخواستیں جمع کرا دیں، ملیکہ بخاری نے کہا کہ درخواست میں ویڈیو میں موجود دونوں رکن قومی اسمبلی کو فریق بنایا گیا ہے۔
ملیکہ بخاری نے کہا کہ ہماری نظر میں فہیم خان اور جمیل احمد گواہ ہیں، کمیشن کی ہدایت پر گواہان کو فریق بنایا ہے، انہوں نے کہا کہ کمیشن سمجھتا ہے کہ کوئی رکن اسمبلی ملوث ہے تو اس کے خلاف تحقیقات کرے۔
ممبر کے پی ارشاد قیصر نے کہا کہ الیکشن کمیشن کے حکم پر من وعن عمل نہیں ہوا، ملیکہ بخاری نے جواب میں کہا کہ انتخابی عمل میں شفافیت الیکشن کمیشن کی ذمہ داری ہے۔
الیکشن کمیشن نے ملیکہ بخاری کو تنبیہہ کرتے ہوئے کہا کہ آہستہ آواز میں تحمل سے بات کریں، آپ جذباتی نہ ہوں آرام سے دلائل دیں۔
ملیکہ بخاری نے کہا کہ الیکشن کمیشن پتہ کرے کہ ویڈیو میں کون لوگ تھے؟ یہ درخواست گزار کا کام نہیں ہے۔
ممبر پنجاب الطاف ابراہیم نے کہا کہ ہم ویڈیو میں موجود لوگوں کی شناخت نہیں کرسکتے، ویڈیوز میں کسی کا چہرہ واضح نہیں ہے۔
اس موقع پر الیکشن کمیشن نے یوسف رضا گیلانی کے وکلاء کو درخواست کی کاپی جمع کرانے کی ہدایت کرتے ہوئے سماعت 5 اپریل تک ملتوی کر دی۔
Comments are closed.