عمران خان نے ہیلی کاپٹر کو سائیکل بنا دیا تھا: حنیف عباسی

مسلم لیگ ن کے رہنما حنیف عباسی کا کہنا ہے کہ عمران خان نے ہالینڈ کے وزیرِ اعظم کے سائیکل پر سفر کے نعرے لگائے اور خود ہیلی کاپٹر کو سائیکل بنا دیا تھا۔

حنیف عباسی نے سردار نسیم کے ہمراہ مسلم لیگ ن کے راولپنڈی میں ہونے والے کنونشن میں شرکت کی۔

اُنہوں نے کنونشن سے خطاب کرتے ہوئے کہا کہ شہباز شریف اور خاندان کے صادق و امین ہونے کی بین الاقوامی سطح پر تصدیق ہو گئی ہے، ڈیلی میل نے ہمارے قائدین کی تذلیل کی، شہبازشریف کے خلاف بین الاقوامی سطح پر تحقیقات ہوئیں اور وہ کلیئر قرار پائے، پارٹی نواز شریف پر جان نچھاور کرتی ہے، رانا ثناء اللّٰہ پر جھوٹا مقدمہ بنایا گیا، عدالت نے انہیں باعزت بری کر دیا۔

اُنہوں نے عمران خان پر تنقید کرتے ہوئے کہا کہ گھڑی چوری تم کرو، زکوٰۃ تم کھاؤ، ملک کی بربادی میں حصّہ ڈالو اور الزام دوسروں پر لگاؤ،فرنٹ پرسن رکھ کر جائیدادیں ضبط اور قبضے تم کرتے رہے ہو، تم لوگوں نے ملک کو بدترین معاشی مسائل، قرضوں کے بوجھ میں پھنسا دیا۔

حنیف عباسی نے شیخ رشید پر تنقید کرتے ہوئے کہا کہ  شیخ رشید کہتے ہیں کہ عمران کا ساتھ نہیں چھوڑوں گا، یہ وہ انسان ہیں جنہوں نے نواز شریف، پرویز مشرف اور چوہدری شجاعت کا ساتھ چھوڑا، میں اور میرے ساتھی ان کا سیاسی قبر تک پیچھا کریں گے۔

اُنہوں نے کہا کہ نواز شریف سے بغض میں پارک کا نام اقبال پارک رکھا گیا، چھوٹی سوچ اور حرکتوں سے نواز شریف کو لوگوں کے دلوں سے نہیں نکال سکو گے، عمران نیازی تم اسمبلی نہیں توڑو گے کیونکہ چوہدری پرویز الہٰی نے اٹک جیل کے 6 بائی 6 کا نقشہ بیان کر کے تمہیں حقیقت بتا دی ہے۔

حنیف عباسی نے کہا کہ پنجاب اور خیبر پختون خوا حکومت کی وجہ سے ہی تو یہ آج آزاد ہیں، ورنہ آئیں اسلام آباد، صرف بڑی بڑی باتیں ہوئیں اور بڑے الزمات لگائے گئے۔

اُنہوں نے کہا کہ وزیرِ اعظم شہباز شریف نے پہلے پنجاب سنوارا، اب پاکستان سنوار رہے ہیں، جیل کاٹی، خاندان جلا وطن ہوا، انجام یہ نکلا کہ بین الاقوامی عدالتوں سے کلیئرنس ہوگئی۔

ن لیگی رہنما نے یہ بھی کہا کہ چاہے مریم نواز ہوں، احسن اقبال ہوں یا شاہد خاقان ہوں سب نے سزا بھگتیں، لیکن اٹک ہو اڈیالہ ہو یا کیمپ جیل کارکنان نے مسلم لیگ ن کا ساتھ نہیں چھوڑا۔

بشکریہ جنگ