سابق ملکی و غیر ملکی کھلاڑی بھی پاکستان کرکٹ ٹیم کے معترف

ٹی ٹوئنٹی ورلڈکپ 2022 سیمی فائنل جیتنے پر پاکستان سمیت دنیا بھر سے سابق کھلاڑیوں اور دیگر شخصیات کی طرف سے قومی کرکٹ ٹیم کو فتح پر مبارکباد دی جا رہی ہے۔

سوئنگ کے سلطان وسیم اکرم نے کہا کہ پاکستان ٹیم اور تمام پاکستانیوں کو مبارک ہو، چلیں اب فائنل انجوائے کریں گے۔

شعیب اختر نے تو پیشگوئی کر دی کہ ٹی 20 ورلڈکپ پاکستان ہی جیتے گا۔

وقار یونس نے کہا کہ پوری قوم کو مبارک ہو، ہم فائنل میں پہنچ گئے ہیں۔

اسپورٹس جرنلسٹ ایشا گوہا نے کہا کہ زمبابوے سے ہارنے کے بعد، افتخار اور شاداب کی بہترین پارٹنرشپ تک، کیا سفر ہے پاکستان کا!

افغان کرکٹ ٹیم کے کھلاڑی راشد خان نے پاکستان کرکٹ بورڈ کو ٹیگ کرتے ہوئے کہا کہ آپ نے زبردست کھیلا۔

بھارتی کرکٹ ٹیم کے سابق بلے باز سریش رائنا نے کہا بابر اور رضوان نے بہترین کھیلا، آپ دونوں نے آج کے میچ میں بہت شاندار کارکردگی دکھائی، ایک بار پھر دو اچھے بیٹرز کے درمیان اہم پارٹنرشپ ہوئی۔

اسپورٹس کمنٹیٹر ڈینی موریسن نے کہا سبز مشین میں ایک دفعہ پھر زندگی لوٹ آئی ہے، ایک بار پھر میلبرن کرکٹ گراؤنڈ میں فائنل ہوگا۔

بشکریہ جنگ