برطانیہ کی رائل ملٹری اکیڈمی سینڈ ہرسٹ میں آرمی چیف کا خطاب

برطانیہ کی رائل ملٹری اکیڈمی سینڈ ہرسٹ میں پاسنگ آؤٹ پریڈ کا آرمی چیف جنرل قمر جاوید باجوہ نے معائنہ کیا ہے۔

آرمی چیف جنرل قمر جاوید باجوہ نے تقریب سے خطاب کرتے ہوئے کہا کہ پاکستان اور برطانیہ کے تعلقات دوستی اور باہمی احترام پر مبنی ہیں۔

سربراہ پاک فوج کا کہنا ہے کہ آج یہاں 41 غیر ملکی کیڈٹس بھی پاس آؤٹ ہو رہے ہیں۔

جنرل قمر جاوید باجوہ پاک فوج کے پہلے سپہ سالار ہیں جنہیں بطور مہمانِ خصوصی پریڈ میں شرکت کی دعوت دی گئی ہے۔

جنرل قمر جاوید باجوہ برٹش ملٹری اکیڈمی میں ملکہ برطانیہ کی نمائندگی کرنے والے پہلے پاکستانی بن گئے۔

برطانوی وزارتِ دفاع کے مطابق جنرل باجوہ نے آج منعقد ہونے والی سوورین پریڈ فار کمیشنگ کورس 213 میں ملکہ برطانیہ کی نمائندگی کی۔

سینڈھرسٹ ملٹری اکیڈمی میں منعقدہ تقریب میں درجنوں ممالک کے فوجی سربراہان بھی شریک ہوئے۔

پریڈ میں جنرل قمر جاوید باجوہ کے ساتھ ڈی جی آئی ایس پی آر میجر جنرل افتخار بابر اور ملٹری اتاشی کرنل رانا آصف خان بھی شریک ہوئے۔

آج تربیت مکمل کرنے والوں میں 208 برٹش کیڈٹس کے علاوہ 26 ممالک کے 41 انٹرنیشنل آفیسرز کیڈٹس بھی شامل تھے۔

وزارتِ دفاع کے مطابق سی سی 213 میں تربیت مکمل کرنے والوں میں پاکستانی کیڈٹس بھی شامل تھے۔

رائل ملٹری اکیڈمی کی بنیاد 1741ء میں وُلچ میں آرٹلری اور انجینئر کی تربیت کے لیے قائم کی گئی تھی۔

دوسری جنگِ عظیم کے بعد رائل ملٹری اکیڈمی اور رائل ملٹری کالج کو ضم کر کے رائل ملٹری اکیڈمی سینڈھرسٹ قائم کی گئی تھی۔

سینڈھرسٹ میں پہلی کمیشنگ پریڈ 14 جولائی 1948ء کو منعقد ہوئی تھی۔

بشکریہ جنگ