خیبر پختون خوا: مالی مشکلات کا شکار 4 جامعات کو فنڈز جاری

محکمۂ اعلیٰ تعلیم نے خیبر پختون خوا کی مالی مشکلات کا شکار 4 جامعات کو فنڈز جاری کر دیے ہیں۔

ان جامعات کو مجموعی طور پر 39 کروڑ 10 لاکھ روپے جاری کیے گئے ہیں۔

محکمۂ اعلیٰ تعلیم کے پی کے ذرائع کے مطابق عبد الولی خان یونیورسٹی کو 12 کروڑ 80  لاکھ، ایگریکلچر یونیورسٹی پشاور کو 10 کروڑ 40 لاکھ روپے، یو ای ٹی مردان کو 2 کروڑ اور اسلامیہ کالج پشاور کو 10 کروڑ 30 لاکھ روپے دیے گئے ہیں۔

محکمۂ اعلیٰ تعلیم کے پی کے ذرائع نے بتایا ہے کہ صوبائی کابینہ نے چترال یونیورسٹی کے لیے 20 کروڑ روپے فنڈز کی منظوری دی ہے۔

دوسری جانب وزیر برائے اعلیٰ تعلیم کامران بنگش نے کہا ہے کہ جامعات کے ساتھ ہر ممکنہ مالی معاونت کر رہے ہیں۔

خیبر پختونخوا کی کئی سرکاری جامعات شدید مالی بحران کا شکار ہیں جس کے باعث یونیوسٹی ملازمین تنخواہوں سے محروم ہیں۔

انہوں نے مزید کہا ہے کہ یونیورسٹیز کو گرانٹ جاری کر دی گئی ہیں، اب جامعات کو مالی مشکلات کا سامنا نہیں ہے۔

 کامران بنگش نے یہ بھی کہا ہے کہ کچھ اساتذہ تنظیمیں محکمۂ اعلیٰ تعلیم کو بدنام کرنے کے لیے غلط بیانی کر رہی ہیں۔

بشکریہ جنگ