سری لنکن فوج اور پولیس کی حکومت مخالف مظاہرین کیخلاف کارروائی، 9 گرفتار

سری لنکا کی پولیس اور فوجی دستوں نے دارالحکومت کولمبو میں ایوانِ صدر کے باہر موجود حکومت مخالف مظاہرین کے کیمپ اکھاڑ پھینکے۔

رانیل وکرماسنگھے سری لنکا کے صدر منتخب ہوچکے ہیں، ان کے انتخاب کے بعد یہ پہلا موقع ہے کہ حکومت مخالف مظاہرین کے خلاف کارروائی کی گئی۔

صدر وکرماسنگھے نے عنان اقتدار سنبھالتے ہی ایک غیر معمولی گزٹ جاری کرتے ہوئے مسلح افواج کو امن و امان قائم رکھنے کا حکم دیا۔

پولیس اور فوجی اہلکاروں نے احتجاجی مظاہرین کے خیمے اکھاڑ پھینکے، پولیس ترجمان نے 9 افراد کی گرفتاری کی بھی تصدیق کردی ہے۔

واضح رہے کہ پچھلے کئی ماہ سے مظاہرین نے قصرِ صدارت کے باہر پڑاؤ ڈالا ہوا تھا، ان کا مطالبہ تھا کہ سابق صدر راجاپکسے سے مستعفی ہوں۔

دارالحکومت میں فوج اور پولیس کے دستوں نے نظم و نسق سنبھال لیا ہے، ایوانِ صدر جانے والے تمام راستے سیل کر دیے گئے ہیں۔

بشکریہ جنگ