برطانوی بلے باز بغیر پیڈ پہنے بیٹنگ کیلئے پہنچ گئے

برطانیہ میں ایک کرکٹ میچ کے دوران بلے باز پیڈ پہنے بغیر ہی بیٹنگ کے لیے وکٹ پر آ گئے۔

سوشل میڈیا پر برطانیہ میں ہونے والے ایک مقامی میچ کی ویڈیو وائرل ہو رہی ہے جس میں ایک بلے باز کو بیٹنگ کے لیے وکٹ پر جاتے دیکھا جا سکتا ہے۔

ساؤتھ اینڈ سوک کرکٹ کلب کے بیٹر مارٹن ہیوجز بیٹنگ کے لیے وکٹ پر پہنچے اور انہوں نے امپائر سے مڈل اسٹمپڈ بھی پوچھا تاہم اسی دوران ان کے قریب کھڑے مخالف کھلاڑیوں نے جب دیکھا کہ مارٹن ہیوجز نے پیڈ نہیں پہنے تو انہوں نے مارٹن ہیوجز کو مخاطب کرتے ہوئے پوچھا کہ آپ نے پیڈ نہیں پہنے، آپ کی ٹانگیں ٹوٹ جائیں گی۔

جب بیٹر نے بھی محسوس کیا کہ وہ پیڈ کے بغیر ہی میدان میں آ گئے ہیں تو امپائر اور بیٹر دونوں بے ساختہ ہنس پڑے۔

اس صورتِ حال کے بعد بیٹر واپس پویلین کی طرف بھاگے اور پیڈ پہن کر بیٹنگ کے لیے دوبارہ گراؤنڈ میں آئے۔

بشکریہ جنگ