آرمی چیف کی قطر میں اہم ملاقاتیں، دفاعی اور سیکیورٹی تعاون پر تبادلہ خیال

آرمی چیف جنرل قمر جاوید باجوہ نے قطر کے سرکاری دورے کے دوران امیر قطر اور نائب وزیراعظم سے اہم ملاقاتیں کی ہیں۔

پاک فوج کے شعبہ تعلقات عامہ کے مطابق جنرل قمر جاوید باجوہ نے قطر کے امیر، نائب وزیراعظم اور وزیراعلیٰ سے ملاقات کی۔

اعلیٰ سطح کی ملاقاتوں میں باہمی دلچسپی کے امور، علاقائی ماحول، دفاعی اور سیکیورٹی تعاون پر تبادلہ خیال کیا گیا۔

پاک فوج کے شعبہ تعلقات عامہ آئی ایس پی آر کے مطابق اس ملاقات میں علاقائی سلامتی کی صورتحال پر بھی تبادلہ خیال ہوا۔

آرمی چیف کا کہنا تھا کہ پاک قطر دوستانہ تعلقات بھائی چارے کے گہرے جذبے کی عظیم تاریخ رکھتے ہیں۔

انہوں نے کہا کہ پاک قطر تعلقات ایک پائیدار شراکت داری میں تبدیل ہو رہے ہیں۔

آئی ایس پی آر کے مطابق فریقین نے تمام شعبوں میں تعاون کو مزید بڑھانے کی اہمیت پر زور دیا۔

قطر نے خطے میں امن و استحکام کے لیے پاکستان کی مسلسل کوششوں کو بھی سراہا۔

قطر کے رہنماؤں اور جنرل قمر جاوید باجوہ نے دونوں برادر ممالک کے درمیان بہتر تعلقات کے لیے کام جاری رکھنے کا عہد کیا۔

بشکریہ جنگ