وزیر خارجہ بننے کے بعد بلاول بھٹو زرداری کی پہلی بار کراچی آمد، شاندار استقبال

پاکستان پیپلز پارٹی (پی پی پی) کے چیئرمین بلاول بھٹو زرداری وزیر خارجہ بننے کے بعد اتوار کی شام پہلی مرتبہ کراچی پہنچے تو ان کا شاندار استقبال کیا گیا۔

 چیئرمین پیپلز پارٹی بلاول بھٹو زرداری اسلام آباد سے خصوصی طیارے میں کراچی پہنچے۔

 ایوی ایشن ذرائع کے مطابق انہیں لے کر آنے والے خصوصی طیارے نے کراچی ایئرپورٹ کے ٹرمینل ون پر لینڈ کیا۔

ذرائع نے بتایا کہ بلاول بھٹو زرداری نے ہلکے بزنس جیٹ ہاکر بیچ کرافٹ میں کراچی کا سفر کیا، جس میں 6 سے 8 مسافروں کے بیٹھنے کی گنجائش ہے۔

وزیراعلیٰ سندھ نے کہا کہ متحدہ کے ساتھ معاہدے میں ایک اہم جز بلدیاتی انتخابات ہے، ہم خود بلدیاتی انتخابات کروانا چاہتے ہیں۔

کراچی ایئرپورٹ پر پیپلز پارٹی کے مرکزی رہنماء استقبال کے لیے موجود تھے۔ ایئر پورٹ کے باہر پاکستان پیپلز پارٹی کے سیکڑوں کارکن بھی ریلیاں لے کر پہنچے ہوئے تھے۔

شارع فیصل کے اسٹار گیٹ چوک پر پاکستان پیپلزپارٹی کی جانب سے استقبالیہ جلسے کا انتظام کیا گیا ہے۔

اس موقع پر کراچی ایئرپورٹ، شاہراہ فیصل اور اطراف میں سخت سیکورٹی انتظامات کیے گئے ہیں، اسٹار گیٹ کے اطراف کئی کلومیٹر تک شارع فیصل، نیشنل ہائی وے اور دیگر اطراف میں ٹریفک بند رکھی گئی ہے۔

 رینجرز اور پولیس کی بھاری نفری سیکیورٹی انتظامات کو مؤثر اور فول پروف بنانے کے لیے تعینات ہے۔

بشکریہ جنگ