پی ٹی آئی کا 25 منحرف ارکان پنجاب اسمبلی کیخلاف الیکشن کمیشن کو خط

پاکستان تحریک انصاف (پی ٹی آئی) نے 25 منحرف اراکین پنجاب اسمبلی کے خلاف ریفرنس پر جلد کارروائی کے لیے الیکشن کمیشن کو خط لکھ دیا۔

پی ٹی آئی نے خط میں منحرف اراکین کے خلاف کارروائی جلد مکمل کرکے انہیں نااہل قرار دینے کا مطالبہ کیا گیا ہے۔

تحریک انصاف نے 25 منحرف اراکین پنجاب اسمبلی کے خلاف کارروائی کے لیے ایڈوکیٹ اظہر صدیق کی وساطت سے الیکشن کمیشن کو خط لکھا ہے۔

خط میں کہا گیا ہے کہ الیکشن کمیشن نے منحرف اراکین کے خلاف بھیجے گئے ریفرنس پرتاحال کوئی کارروائی نہیں کی۔

خط میں مزید کہا گیا کہ آئین کےآرٹیکل 63 اے کے تحت 30 دن میں منحرف اراکین کے خلاف ریفرنس کا فیصلہ ضروری ہے، جسے جلد سماعت کے لیے مقرر کیا جائے۔

خط میں مطالبہ کیا گیا ہے کہ 25 منحرف اراکین کے خلاف کارروائی مکمل کر کے انہیں نااہل قرار دیا جائے۔

بشکریہ جنگ