حمزہ شہباز کے حلف کیلئے دوبارہ دائر خواست پر بھی اعتراض
لاہور ہائیکورٹ میں حمزہ شہباز کے حلف کے لیے دوبارہ دائر درخواست پر پھر سے اعتراض لگا دیا گیا۔
ہائیکورٹ آفس نے دوبارہ دائر درخواست میں گورنر پنجاب کو فریق بنانے کا اعتراض عائد کیا۔
حمزہ شہباز نے اعظم نذیر تارڑ، عطا اللّٰہ تارڑ کی وساطت سے آئینی درخواست دائر کی، گزشتہ روز ہائیکورٹ نے درخواست نامکمل ہونے کی بنا پر واپس کردی تھی۔
حمزہ شہباز کی درخواست میں گورنر پنجاب اور چیف سیکرٹری پنجاب کو فریق بنایا گیا۔
درخواست گزار حمزہ شہباز کا دائر درخواست میں موقف ہے کہ 16 اپریل کو 197ووٹ لے کر قائد ایوان منتخب ہو چکا ہوں، قانون کے مطابق گورنر کو وزیر اعلیٰ کا حلف لینا تھا لیکن انہوں نے انکار کر دیا ہے۔
حمزہ شہباز کا کہنا ہے کہ گورنر اپنی ذمہ داریاں پوری نہ کرکے آئین کی خلاف ورزی کر رہے ہیں۔
حمزہ شہباز نے درخواست میں استدعا کی کہ لاہور ہائیکورٹ گورنر پنجاب کو حلف لینے کے احکامات جاری کرے۔
واضح رہے کہ لاہور ہائی کورٹ نے حمزہ شہباز کی درخواست گزشتہ روز نا مکمل قراردے کر واپس کردی تھی اور رجسٹرار آفس نے موقف اختیار کیا تھا کہ درخواست کے ساتھ مطلوبہ مکمل دستاویزات منسلک نہیں ہیں۔
Comments are closed.