PTI سے نہیں،ن لیگ سے مزید استعفے آئینگے: فوادچوہدری

پاکستان تحریکِ انصاف کے رہنما فواد چوہدری کا کہنا ہے کہ وزیرِ اعظم شہباز شریف کے سوشل میڈیا کے فوکل پرسن احمد جواد نے استعفیٰ دے دیا، پی ٹی آئی سے نہیں، بلکہ ن لیگ سے مزید استعفے آئیں گے۔

یہ بات انہوں نے دیگر پاکستان تحریکِ انصاف کے رہنماؤں کے ہمراہ میڈیا سے گفتگو کے دوران کہی ہے۔

فواد چوہدری کا کہنا ہے کہ تھوڑی دیر پہلے جن ایم پی ایز کے نام دیے گئے تھے، تینوں نے بیان دیا ہے کہ سوال ہی پیدا نہیں ہوتا کہ ہم تحریکِ انصاف چھوڑیں۔

پاکستان تحریکِ انصاف کے رہنما اسد عمر کا کہنا ہے کہ ہم کسی کو فتح کرنے نہیں نکل رہے، الیکشن کراؤ اس کے علاوہ کوئی حل نہیں۔

انہوں نے کہا کہ پرسوں کہا گیا کہ شیخ رشید لانگ مارچ میں شریک نہیں ہوں گے، آج یہ کہہ دیا گیا، اس وقت پی ٹی آئی کو وہ طبقہ چھوڑ سکتا ہے، جس نے آگے سیاست نہیں کرنی۔

پی ٹی آئی رہنما نے کہا کہ جس نے سیاسی خودکشی کرنی ہے وہ عمران خان کو چھوڑے گا، اس کے علاوہ کون چھوڑے گا یا پھر ریٹ بہت ہائی ہو گا جو علیحدہ بات ہے۔

سابق وفاقی وزیر فواد چوہدری نے یہ بھی کہا ہے کہ پوری پارٹی عمران خان کے ساتھ کھڑی ہے، لوگ اس سے جڑ رہے ہیں۔

واضح رہے کہ پاکستان تحریکِ انصاف نے آج اسلام آباد کے لیے لبرٹی چوک لاہور سے اپنے لانگ مارچ کا آغاز کر دیا ہے۔

چیئرمین پی ٹی آئی عمران خان اس لانگ مارچ کی قیادت کر رہے ہیں۔

بشکریہ جنگ