وزیراعلیٰ پنجاب کی ہدایت پر خاتون مسافر سے بدسلوکی پر الیکٹرک بس کے کنڈیکٹر سے معافی منگوالی گئی

واقعے کی ویڈیو سوشل میڈیا پر وائرل ہونے کے بعد پنجاب کے وزیر ٹرانسپورٹ بلال اکبر خان نے نوٹس لے کر نجی کمپنی کے کنڈیکٹر علی رضوان کو ملازمت سے فارغ کردیا تھا— فوٹو: اسکرین گریب

وزیراعلیٰ پنجاب مریم نواز کی ہدایت پر خاتون مسافر سے مبینہ بدسلوکی پر گرین الیکٹرک بس کے کنڈیکٹر سے معافی منگوالی گئی۔

واقعے کی ویڈیو سوشل میڈیا پر وائرل ہونے کے بعد پنجاب کے وزیر ٹرانسپورٹ بلال اکبر خان نے نوٹس لے کر نجی کمپنی کے کنڈیکٹر علی رضوان کو ملازمت سے فارغ کردیا تھا۔

وزیراعلیٰ پنجاب مریم نواز نے بھی واقعے کا نوٹس لیا اور بیان میں کہا کہ صرف نوکری سے فارغ کرنا کافی نہیں، کنڈیکٹر کو پکڑ کر خاتون کے گھر لے جایا جائے اور سب کے سامنے معافی منگوائی جائے، انہوں نے ڈی آئی جی فیصل کامران کو ہدایت بھی جاری کی۔

بعد ازاں بس کےکنڈیکٹرنے خاتون کودھکا دینے پر معافی مانگ لی جس کی ویڈیو وزیراعلیٰ مریم نواز نے شیئر کی۔

کنڈیکٹر کا کہنا تھاکہ خاتون سے جو سلوک کیا انتہائی غلط تھا اس کے لیے شرمندہ ہوں، پوری قوم سے معافی مانگتا ہوں۔ کنڈیکٹرکا کہنا تھاکہ توبہ کرتا ہوں کبھی بھی کسی سےایسا رویہ نہیں رکھوں گا۔