ہفتہ، 21 نومبر، 2026 · 12 جمادی الثانی، 1448 ہجری

آسٹریلیا میں لاکھوں سرخ کیکڑوں کی ساحل کی جانب سالانہ ہجرت شروع

قومی خبریں
آسٹریلیا میں لاکھوں سرخ کیکڑوں کی ساحل کی جانب سالانہ ہجرت شروع

سڈنی : آسٹریلیا کے کرسمس آئی لینڈ میں لاکھوں سرخ کیکڑوں کی سالانہ نقل مکانی کا آغاز ہوگیا ہے، جہاں افزائشِ نسل کے لیے یہ ننھے کیکڑے اپنے جنگلاتی ٹھکانوں سے نکل کر ساحل کی جانب سفر کر رہے ہیں۔ جزیرے پر سرخ کیکڑوں کی بڑی تعداد میں ایک ساتھ نقل و حرکت نے قدرت کا ایک منفرد اور دلکش منظر پیش کردیا ہے، جسے دیکھنے کے لیے مقامی افراد اور سیاحوں کی دلچسپی بڑھ گئی ہے۔

کرسمس آئی لینڈ دنیا بھر میں سرخ کیکڑوں کی سالانہ ہجرت کے حوالے سے شہرت رکھتا ہے۔ ہر سال لاکھوں کی تعداد میں یہ کیکڑے اپنے جنگلاتی مسکن سے نکلتے ہیں اور افزائشِ نسل کے لیے سمندر کی طرف روانہ ہوتے ہیں۔ اس دوران سڑکوں، راستوں اور جنگلاتی علاقوں میں سرخ کیکڑوں کی بڑی تعداد دکھائی دیتی ہے، جس سے پورا جزیرہ سرخ رنگ کے ایک وسیع منظر میں تبدیل ہوجاتا ہے۔

کرسمس آئی لینڈ نیشنل پارک نے اس قدرتی منظر کو دنیا بھر کے لوگوں تک پہنچانے کے لیے روزانہ براہ راست نشریات کا بھی آغاز کردیا ہے۔ اس مقصد کے لیے 16 فٹ بلند خصوصی ریڈ کرب برج سے کیکڑوں کی نقل و حرکت دکھائی جا رہی ہے۔ یہ پل کیکڑوں کو مصروف سڑک محفوظ طریقے سے عبور کرنے میں مدد فراہم کرتا ہے، تاکہ گاڑیوں کی آمدورفت کے دوران ان کی بڑی تعداد کو نقصان سے بچایا جاسکے۔

سرخ کیکڑوں کی یہ سالانہ نقل مکانی جزیرے کے قدرتی ماحول اور مون سون کی بارشوں سے گہرا تعلق رکھتی ہے۔ عام طور پر یہ سفر اکتوبر یا نومبر میں مون سون کی پہلی بارش کے ساتھ شروع ہوتا ہے، بعض برس بارشوں میں تاخیر کے باعث کیکڑوں کی نقل مکانی دسمبر یا جنوری تک مؤخر ہوسکتی ہے۔

بارش کا آغاز ہوتے ہی لاکھوں سرخ کیکڑے اپنے جنگلاتی ٹھکانوں سے باہر نکل آتے ہیں اور سمندر کی جانب سفر شروع کردیتے ہیں۔ اس دوران نر اور مادہ کیکڑے طویل فاصلہ طے کرکے ساحل تک پہنچتے ہیں، جہاں افزائشِ نسل کا قدرتی عمل مکمل ہوتا ہے۔ مادہ کیکڑے ساحل کے قریب بلوں میں انڈے دیتی ہیں اور مناسب وقت پر انہیں سمندر میں چھوڑ دیتی ہیں، جہاں سے کیکڑوں کی نئی نسل کی زندگی کا آغاز ہوتا ہے۔

اس قدرتی عمل کی خاص بات یہ ہے کہ لاکھوں کیکڑے تقریباً ایک ہی موسم میں ایک ساتھ نقل مکانی کرتے ہیں۔ ان کی منزل ساحلی علاقے ہوتے ہیں، اس لیے راستے میں سڑکیں، پل اور دیگر رکاوٹیں ان کے لیے مشکلات پیدا کرسکتی ہیں۔ اسی وجہ سے کرسمس آئی لینڈ میں ان کی حفاظت کے لیے خصوصی انتظامات کیے جاتے ہیں، جن میں مخصوص پل، راستوں کی نگرانی اور بعض مقامات پر گاڑیوں کی آمدورفت محدود کرنا شامل ہے۔

کرسمس آئی لینڈ نیشنل پارک کی جانب سے براہ راست نشریات کا مقصد اس غیر معمولی قدرتی مظہر کو دنیا بھر کے ناظرین تک پہنچانے کے ساتھ ساتھ جنگلی حیات کے تحفظ سے متعلق آگاہی پیدا کرنا بھی ہے۔ سرخ کیکڑوں کی یہ ہجرت نہ صرف جزیرے کی حیاتیاتی اہمیت کو اجاگر کرتی ہے بلکہ قدرت کے حیرت انگیز نظام اور جانداروں کی افزائشِ نسل کے منفرد طریقہ کار کی بھی عکاسی کرتی ہے۔

بشکریہ روزنامہ جسارت