اسلام آباد میں سیکیورٹی ہائی الرٹ، داخلی و خارجی راستوں پر چیکنگ سخت

اسلام آباد : وفاقی دارالحکومت اسلام آباد میں سیکیورٹی ہائی الرٹ کردی گئی ہے جبکہ شہر کے داخلی اور خارجی راستوں پر چیکنگ کا عمل مزید سخت کردیا گیا ہے۔ پولیس نے شہریوں کے جان و مال کے تحفظ اور کسی بھی ممکنہ شرپسندانہ سرگرمی کی روک تھام کے لیے سیکیورٹی اقدامات بڑھاتے ہوئے مختلف مقامات پر نگرانی اور چیکنگ کا نظام مؤثر بنانے کی ہدایت کردی ہے۔
ترجمان اسلام آباد پولیس کے مطابق وفاقی دارالحکومت میں سیکیورٹی صورتحال کے پیش نظر ہائی الرٹ جاری کیا گیا ہے اور شہر کے داخلی و خارجی راستوں پر پولیس اہلکار تعینات کرکے چیکنگ سخت کردی گئی ہے۔ مختلف مقامات پر آنے اور جانے والی گاڑیوں کی نگرانی کی جا رہی ہے جبکہ مشکوک افراد اور سرگرمیوں پر کڑی نظر رکھنے کے لیے سیکیورٹی انتظامات مزید مؤثر بنائے گئے ہیں۔
ترجمان کا کہنا ہے کہ شہریوں کے جان و مال کے تحفظ، امن و امان کی صورتحال برقرار رکھنے اور شرپسند عناصر کی سرکوبی کے لیے تمام ضروری اقدامات کیے جا رہے ہیں۔ پولیس مختلف مقامات پر اپنی موجودگی بڑھانے کے ساتھ ساتھ نگرانی کے نظام کو بھی فعال رکھے ہوئے ہے تاکہ کسی بھی مشکوک سرگرمی کی بروقت نشاندہی کرکے فوری کارروائی کی جا سکے۔
اسلام آباد پولیس کے مطابق داخلی اور خارجی راستوں پر چیکنگ کے دوران گاڑیوں اور افراد کی جانچ پڑتال کی جا رہی ہے، جس کا مقصد شہر میں امن و امان برقرار رکھنا اور کسی بھی ناخوشگوار واقعے سے قبل حفاظتی اقدامات یقینی بنانا ہے۔ سیکیورٹی انتظامات کے تحت چیکنگ کے عمل کو جدید نگرانی کے نظام سے منسلک کیا گیا ہے تاکہ پولیس کی کارروائیوں پر مسلسل نظر رکھی جا سکے اور صورتحال کے مطابق اقدامات کیے جائیں۔
ترجمان اسلام آباد پولیس نے شہریوں سے اپیل کی ہے کہ وہ داخلی اور خارجی راستوں پر چیکنگ کے دوران پولیس افسران کے ساتھ تعاون کریں، شناخت اور ضروری دستاویزات اپنے ہمراہ رکھیں اور چیکنگ کے عمل میں غیر ضروری تاخیر یا مشکلات پیدا کرنے سے گریز کریں۔
پولیس کا کہنا ہے کہ شہریوں کا تعاون سیکیورٹی انتظامات کو مؤثر بنانے اور شہر میں امن و امان قائم رکھنے میں اہم کردار ادا کرتا ہے، چیکنگ کے تمام مراحل کو سیف سٹی کے ذریعے مانیٹر کیا جا رہا ہے جبکہ سیکیورٹی صورتحال پر مسلسل نظر رکھی جا رہی ہے۔ پولیس نے شہریوں کو ہدایت کی ہے کہ وہ کسی بھی مشکوک شخص، گاڑی یا سرگرمی کی اطلاع فوری طور پر متعلقہ حکام کو دیں تاکہ بروقت کارروائی کی جا سکے اور وفاقی دارالحکومت میں امن و امان برقرار رکھنے کے لیے مشترکہ کوششیں جاری رکھی جا سکیں۔
بشکریہ روزنامہ جسارت