سردیوں میں کینو اور مالٹے کا استعمال صحت کے لیے کیوں ضروری ہے؟
سردیوں کے موسم میں نزلہ، زکام اور کھانسی جیسے مسائل سے بچنے کے لیے ماہرین غذائیت نے وٹامن سی سے بھرپور ترش پھلوں جیسے کینو اور مالٹے کے استعمال کو بہترین طبی حکمت عملی قرار دیا ہے جو جسمانی دفاعی نظام کو مضبوط بنانے میں کلیدی کردار ادا کرتے ہیں۔
کینو اور مالٹے میں وٹامن سی کے علاوہ پوٹاشیم، فائبر، وٹامن اے اور متعدد اینٹی آکسیڈنٹس وافر مقدار میں موجود ہوتے ہیں۔ یہ اجزاء نہ صرف ہڈیوں اور پٹھوں کی مضبوطی میں مددگار ہیں بلکہ جلد میں کولیجن پیدا کرکے اسے جوان اور صحت مند رکھنے کی صلاحیت بھی رکھتے ہیں۔
دماغی صحت کے حوالے سے یہ پھل انتہائی مفید ہیں کیونکہ ان میں شامل فلیوونائڈز یادداشت کو بہتر بنانے میں مدد دیتے ہیں۔ تحقیق کے مطابق باقاعدگی سے مالٹے کا جوس پینے والے افراد میں فالج کا خطرہ کم ہوتا ہے اور یہ بڑھتی عمر کے اثرات کو سست بناتے ہیں۔
آنکھوں کی بینائی کو محفوظ رکھنے میں بھی ان پھلوں کا کردار نمایاں ہے، کیونکہ یہ میکولر ڈیجنریشن جیسے امراض کے خطرے کو کم کرتے ہیں۔ عمر رسیدہ افراد اگر اپنی روزمرہ خوراک میں ان پھلوں کو شامل کریں تو وہ اپنی بینائی کے معیار کو کافی حد تک برقرار رکھ سکتے ہیں۔
دل کی صحت کے لیے کینو اور مالٹے کے فوائد ناقابل تردید ہیں، کیونکہ یہ پھل ہائی بلڈ پریشر اور کولیسٹرول کی سطح کو متوازن رکھنے میں معاونت کرتے ہیں۔
ماہرین کے مطابق طویل عرصے تک ان کا استعمال جسم میں نقصان دہ کولیسٹرول کو کم کرکے دل کے امراض سے بچاتا ہے۔
تاہم یہ بات ذہن نشین رہنی چاہیے کہ کینو یا مالٹا کسی بھی بیماری کا مکمل علاج نہیں ہیں۔ یہ پھل انسانی جسم کے مدافعتی نظام کو سہارا دیتے ہیں تاکہ بیماریاں ہونے کی صورت میں جسم کا قدرتی دفاع زیادہ مستعدی اور مؤثر طریقے سے اپنا کام مکمل کر سکے۔
آخر میں یہ کہ ہر قسم کی غذائی افادیت کے باوجود متوازن غذا ہی صحت کی ضامن ہے۔ موسمی پھلوں کا استعمال ایک اچھی عادت ہے جو انسان کو ہشاش بشاش رکھنے اور روزمرہ کے کاموں میں توانائی فراہم کرنے کے ساتھ ساتھ جسمانی نظام کو اندرونی طور پر مستحکم بنانے میں مددگار ثابت ہوتی ہے۔
بشکریہ روزنامہ جسارت