بدھ، 18 نومبر، 2026 · 9 جمادی الثانی، 1448 ہجری

ٹرمپ اور تھائی لینڈ کے درمیان بڑے تجارتی معاہدے: امریکی برآمدات پر تمام ٹیرف ختم

قومی خبریں
ٹرمپ اور تھائی لینڈ کے درمیان بڑے تجارتی معاہدے: امریکی برآمدات پر تمام ٹیرف ختم

منیلا: امریکی صدر ڈونلڈ ٹرمپ نے تھائی لینڈ کے ساتھ بڑے تجارتی معاہدے کا اعلان کرتے ہوئے کہا ہے کہ تھائی لینڈ امریکی برآمدات پر تمام درآمدی محصولات (ٹیرف) ختم کرے گا، جبکہ امریکی مصنوعات کی درآمد میں حائل غیر ٹیرف تجارتی رکاوٹیں بھی دور کی جائیں گی۔

خبر رساں ادارے رائٹرز کے مطابق امریکی صدر ڈونلڈ ٹرمپ اور تھائی لینڈ کے وزیراعظم انوتن چارن ویراکول نے 17 نومبر 2026 کو فلپائن کے دارالحکومت منیلا میں آسیان سربراہی اجلاس کے موقع پر باہمی تجارت سے متعلق مشترکہ اعلامیے پر دستخط کیے۔

صدر ٹرمپ نے اس پیش رفت کو دونوں ممالک کے درمیان تجارتی تعلقات کے لیے اہم قرار دیتے ہوئے کہا کہ تھائی لینڈ امریکی مصنوعات پر تمام ٹیرف ختم کرے گا۔ اس کے علاوہ امریکی گاڑیوں، طبی آلات، ادویات، ایتھانول اور پولٹری مصنوعات کی درآمد میں حائل نمایاں غیر ٹیرف رکاوٹیں بھی دور کی جائیں گی۔

ٹرمپ کے مطابق تھائی لینڈ تقریباً 2 ارب 60 کروڑ ڈالر مالیت کی اضافی امریکی زرعی مصنوعات بھی خریدے گا، جس سے امریکی کسانوں اور زرعی شعبے کو فائدہ پہنچنے کی توقع ہے۔

امریکی صدر نے کہا کہ یہ معاہدہ امریکا اور تھائی لینڈ کے درمیان مضبوط تجارتی تعلقات کی بنیاد فراہم کرے گا اور دونوں ممالک کو مزید قریب لانے میں مدد دے گا۔ انہوں نے امید ظاہر کی کہ آئندہ چند ہفتوں میں باضابطہ تجارتی معاہدے کی تفصیلات بھی حتمی شکل اختیار کر لیں گی۔

دوسری جانب تھائی لینڈ کے وزیراعظم انوتن چارن ویراکول نے کہا کہ اس پیش رفت سے دونوں ممالک کے تجارتی تعلقات میں مزید وسعت آئے گی اور کاروباری اداروں سمیت تمام متعلقہ فریقوں کے لیے نئے مواقع پیدا ہوں گے۔ انہوں نے تسلیم کیا کہ باضابطہ معاہدے کو حتمی شکل دینے کے لیے ابھی کچھ امور پر کام باقی ہے۔

تھائی لینڈ کی حکومت کے ترجمان کے مطابق دونوں ممالک اب معاہدے کی قانونی تفصیلات تیار اور ان کا جائزہ لیں گے، جس کے بعد اپنے اپنے ملکوں کے قانونی طریقہ کار کے تحت اسے حتمی منظوری کے لیے پیش کیا جائے گا۔ تھائی حکومت متعلقہ شعبوں سے بھی اس بارے میں آرا حاصل کرے گی اور بعد ازاں معاہدہ پارلیمنٹ میں پیش کیا جائے گا۔

رائٹرز کے مطابق امریکا تھائی لینڈ کی سب سے بڑی برآمدی منڈی ہے اور رواں سال تھائی لینڈ کی مجموعی برآمدات میں امریکی منڈی کا حصہ تقریباً 24.6 فیصد رہا ہے۔ یہی وجہ ہے کہ دونوں ممالک کے درمیان تجارتی مذاکرات تھائی معیشت کے لیے خاص اہمیت رکھتے ہیں۔

واضح رہے کہ دونوں ممالک نے اکتوبر 2025 میں بھی تجارتی معاہدے کے ابتدائی فریم ورک کا اعلان کیا تھا، جس کے تحت تھائی لینڈ نے تقریباً 99 فیصد امریکی مصنوعات پر ٹیرف ختم کرنے اور مختلف تجارتی رکاوٹیں کم کرنے پر اتفاق کیا تھا۔

بشکریہ روزنامہ جسارت