منگل، 17 نومبر، 2026 · 8 جمادی الثانی، 1448 ہجری

ایران کے معروف عالمِ دین آیت اللہ وحید خراسانی 108 برس کی عمر میں انتقال کرگئے

قومی خبریں
ایران کے معروف عالمِ دین آیت اللہ وحید خراسانی 108 برس کی عمر میں انتقال کرگئے

تہران: ایران کے ممتاز مذہبی رہنما اور جید عالمِ دین آیت اللہ وحید خراسانی 108 برس کی عمر میں وفات پاگئے۔ ان کے انتقال کی تصدیق ایرانی ذرائع ابلاغ نے ان کے دفتر سے جاری ہونے والے باضابطہ بیان کے حوالے سے کی ہے۔

ان کے دفتر کی جانب سے جاری اعلامیے میں وفات کی اطلاع دیتے ہوئے کہا گیا ہے کہ نمازِ جنازہ، تدفین اور تعزیتی اجتماعات کے انعقاد سے متعلق تفصیلات مناسب وقت پر جاری کردی جائیں گی۔

ایرانی ذرائع ابلاغ کے مطابق آیت اللہ وحید خراسانی نے اپنی زندگی کا بیشتر حصہ دینی علوم کے حصول، تحقیق اور تدریس کے لیے وقف کیے رکھا۔ انہوں نے ابتدائی مذہبی تعلیم ایران کے شہر مشہد میں حاصل کی، جس کے بعد دینی علوم میں اپنی علمی و تحقیقی سرگرمیوں کو آگے بڑھایا اور طویل عرصے تک تدریسی خدمات انجام دیتے رہے۔

رپورٹس کے مطابق ان کا تدریسی سلسلہ 2018ء تک جاری رہا، تاہم علالت کے باعث انہیں بعد ازاں باقاعدہ تدریس کا سلسلہ ترک کرنا پڑا۔ بیماری کے باعث عملی تدریسی سرگرمیاں محدود ہونے کے باوجود ان کی علمی زندگی کا ایک طویل حصہ دینی تعلیم و تحقیق سے وابستہ رہا۔

آیت اللہ وحید خراسانی کے انتقال کے بعد ان کی نمازِ جنازہ اور تدفین کے مقام و وقت سمیت دیگر متعلقہ انتظامات کے بارے میں ان کے دفتر کی جانب سے باضابطہ اعلان متوقع ہے۔

بشکریہ روزنامہ جسارت