بازار کے پیک شدہ کھانوں کا مسلسل استعمال مٹاپے اور دل کی بیماریوں کا سبب

آج کل کے تیز رفتار دور میں لوگ سہولت کی خاطر بازار سے ملنے والے تیار اور پیک شدہ کھانوں کا بکثرت استعمال کر رہے ہیں۔
طبی ماہرین نے خبردار کیا ہے کہ یہ غذائیں گھر میں تازہ تیار کردہ کھانوں کا ہرگز متبادل نہیں ہو سکتیں۔
ان تیار کھانوں کو طویل عرصے تک خراب ہونے سے بچانے کے لیے مختلف قسم کے کیمیائی اجزاء، مصنوعی رنگ اور ذائقے شامل کیے جاتے ہیں۔ یہ پریزرویٹوز انسانی صحت پر انتہائی منفی اثرات ڈالتے ہیں اور طویل عرصے تک ان کا استعمال سنگین طبی مسائل پیدا کرتا ہے۔
پیک شدہ مصنوعات میں نمک کی مقدار حد سے زیادہ ہوتی ہے جو انسانی جسم کے لیے نقصان دہ ثابت ہوتی ہے۔ نمک کی یہ زیادتی ہائی بلڈ پریشر کا باعث بنتی ہے، جو آگے چل کر دل کی بیماریوں اور فالج جیسے خطرناک امراض کے خطرات کو کئی گنا بڑھا دیتی ہے۔
غذائی ماہرین کا کہنا ہے کہ ان کھانوں میں انسانی جسم کے لیے ضروری وٹامنز، معدنیات اور فائبر کی شدید کمی ہوتی ہے۔ ان مصنوعات کے ذریعے جسم کو صرف کیلوریز ملتی ہیں، جبکہ صحت بخش غذائی اجزاء نہ ہونے کے برابر ہوتے ہیں، جو جسم کی نشوونما کے لیے بہت ضروری ہیں۔
ان کھانوں میں شامل غیر صحت بخش چکنائی، جسے سیچوریٹڈ اور ٹرانس فیٹس کہا جاتا ہے، کولیسٹرول کی سطح میں خطرناک حد تک اضافہ کرتی ہے۔ اس سے شریانوں کے مسائل پیدا ہوتے ہیں اور دل کی بیماریوں کا امکان بڑھ جاتا ہے، جو کسی بھی صحت مند انسان کے لیے خطرے کی گھنٹی ہے۔
ان تیار کھانوں میں شکر اور چکنائی کی بھرمار ہوتی ہے، جس سے کیلوریز کی مقدار بہت زیادہ بڑھ جاتی ہے۔ ایک عام پیک شدہ کھانے میں آٹھ سو تک کیلوریز موجود ہوتی ہیں، جس کا مسلسل استعمال تیزی سے وزن میں اضافے اور مٹاپے کا سبب بنتا ہے۔ صحت مند رہنے کے لیے گھر کے تازہ کھانوں کو ترجیح دینا ہی واحد محفوظ اور بہترین راستہ ہے۔
بشکریہ روزنامہ جسارت