فالج کے مریضوں کے علاج معالجے کے اخراجات آئندہ دہائی میں کئی گنا بڑھنے کا خدشہ: رپورٹ

فالج کے مریضوں کو ہنگامی طبی امداد فراہم کرنے، علاج اور بعد ازاں بحالی کے مراحل پر اٹھنے والے بھاری اخراجات نے صحت کے نظام اور ٹیکس دہندگان پر مالی دباؤ بڑھا دیا ہے۔ ایک نئی تحقیق میں انکشاف کیا گیا ہے کہ فالج سے متاثرہ افراد کی دیکھ بھال پر ہر 5 منٹ میں 2 لاکھ 44 ہزار پاؤنڈ خرچ ہوتے ہیں، جو تقریباً ایک مکان کی قیمت کے برابر ہیں۔

اسٹروک ایسوسی ایشن کی تحقیق کے مطابق فالج کے باعث پیدا ہونے والے طبی اور معاشرتی اخراجات کی مجموعی مالیت سالانہ 25.7 ارب پاؤنڈ تک پہنچ چکی ہے، جبکہ روزانہ کی بنیاد پر اس مد میں 70.4 ملین پاؤنڈ خرچ ہو رہے ہیں۔ یہ تمام اخراجات بالواسطہ یا بلاواسطہ ٹیکس دہندگان پر مالی بوجھ کا سبب بن رہے ہیں۔

رپورٹ میں بتایا گیا ہے کہ فالج سے متاثرہ افراد کی دیکھ بھال پر خرچ ہونے والی مجموعی رقم کا نصف سے زیادہ حصہ سماجی نگہداشت کے شعبے میں صرف ہوتا ہے۔ اس میں مریضوں کی روزمرہ ضروریات پوری کرنے، طویل مدتی دیکھ بھال اور معمولاتِ زندگی کی بحالی سے متعلق اخراجات شامل ہیں۔

اسٹروک ایسوسی ایشن نے خبردار کیا ہے کہ اگر فالج کی بروقت تشخیص، مؤثر علاج اور مریضوں کی بحالی کے نظام کو بہتر نہ بنایا گیا تو صورت حال مزید سنگین ہو سکتی ہے۔ موجودہ تخمینوں کے مطابق 2035 تک اس بیماری کے باعث ہونے والے سالانہ اخراجات میں 40 فیصد اضافہ متوقع ہے، جس کے بعد یہ رقم بڑھ کر 35.9 ارب پاؤنڈ تک پہنچ سکتی ہے۔

فالج کے اثرات صرف مریض کی صحت تک محدود نہیں رہتے بلکہ اس کے نتیجے میں دماغ کو پہنچنے والا نقصان زندگی کے بنیادی معمولات بھی متاثر کر سکتا ہے۔ اس بیماری سے زندہ بچ جانے والے متعدد افراد کو دوبارہ چلنے، بولنے اور کھانا نگلنے جیسی بنیادی صلاحیتیں سیکھنے کے لیے طویل عرصے تک علاج اور بحالی کے مراحل سے گزرنا پڑتا ہے۔

طبی ماہرین کے مطابق فالج کے جسمانی اثرات کے ساتھ مریضوں کی ذہنی صحت بھی بری طرح متاثر ہو سکتی ہے۔ اعداد و شمار کے مطابق فالج کے حملے سے بچ جانے والے تقریباً ایک تہائی افراد ڈپریشن کا شکار ہو جاتے ہیں، جس سے ان کی بحالی کا عمل مزید پیچیدہ ہو جاتا ہے۔

دوسری جانب سینٹینیل اسٹروک نیشنل آڈٹ پروگرام کے اعداد و شمار میں بحالی کی سہولیات کی فراہمی کے حوالے سے بھی تشویش ناک صورت حال سامنے آئی ہے۔ پروگرام کے مطابق فالج سے متاثرہ صرف 7 فیصد مریضوں کو صحت اور نگہداشت کے قومی ادارے کی جانب سے تجویز کردہ بحالی کی سہولیات میسر آتی ہیں، جبکہ باقی مریض مطلوبہ طبی معاونت سے محروم رہ جاتے ہیں۔

اسٹروک ایسوسی ایشن کا مؤقف ہے کہ فالج کے مریضوں کے لیے تشخیص سے لے کر علاج اور بحالی تک تمام مراحل کو مربوط اور مؤثر بنانا ضروری ہے، بصورت دیگر نہ صرف متاثرہ افراد اور ان کے اہل خانہ کو طویل مدتی مشکلات کا سامنا کرنا پڑے گا بلکہ اس بیماری پر اٹھنے والے مالی اخراجات میں بھی نمایاں اضافہ ہوتا رہے گا۔