سلمان اکرم راجہ کا بانی پی ٹی آئی سے وکلا کی ملاقات پر شکوک کا اظہار

پی ٹی آئی کے سیکریٹری جنرل سلمان اکرم راجہ نے جیل میں وکلا کی بانی پی ٹی آئی سے ملاقات پر شکوک ظاہر کرتے ہوئے کہا ہے کہ آئندہ بھی مزید منظورِ نظر افراد کو ان سے ملنے کے لیے بھیجا جاسکتا ہے۔

ان کے مطابق اس ملاقات کے کچھ مقاصد تھے اور اس دوران سیاسی گفتگو کا موقع بھی فراہم کیا گیا۔

سلمان اکرم راجہ کے مطابق بانی پی ٹی آئی نے کہا ہے کہ بہتر گورننس کے لیے چھوٹے صوبے اور انتظامی یونٹس ہونے چاہییں، تاہم اس مقصد کے لیے ایسا طریقہ اختیار نہیں کیا جاسکتا جہاں ووٹ کی عزت نہ ہو اور اتنا بڑا فیصلہ کرلیا جائے۔

بانی پی ٹی آئی کے مؤقف کا حوالہ دیتے ہوئے انہوں نے کہا کہ آئین میں ریفرنڈم کے ذریعے صوبے بنانے کی کوئی گنجائش نہیں۔ جب پورے نظام میں ووٹ کی حرمت برقرار نہیں تو ریفرنڈم کی حرمت کیسے قائم ہوسکتی ہے۔