گرین لینڈ پر برفانی چادر کی تاریخ سے متعلق اہم سائنسی انکشاف سامنے آ گیا

نیویارک: سائنسدانوں نے انکشاف کیا ہے کہ 5 لاکھ 16 ہزار سال پہلے زمین پر ایک ایسا دور آیا تھا جب گرم موسم کی شدت کے باعث گرین لینڈ کی وسیع برفانی چادر پگھل کر اپنی اصل جگہ سے 60 میل پیچھے ہٹ گئی تھی۔

یونیورسٹی آف بفیلو کے ماہرین نے اپنی تحقیق میں بتایا ہے کہ اس قدیم دور میں موسمِ گرما کا درجہ حرارت موجودہ دور کے مقابلے میں 4.7 ڈگری سینٹی گریڈ زیادہ تھا۔ یہ انکشاف خطے کی بدلتی ہوئی آب و ہوا کو سمجھنے کے لیے ایک اہم سنگِ میل ہے۔

تحقیق کے مطابق اس دوران گرین لینڈ کا وہ علاقہ مکمل طور پر برف سے پاک تھا جہاں آج سرد جنگ کے دوران بنایا گیا امریکی خفیہ فوجی اڈہ موجود ہے۔ محققین نے کیمپ سینچری کے نام سے مشہور اس اڈے کے نیچے موجود مٹی کی تہوں کا بغور جائزہ لینے کے بعد یہ اہم نتائج اخذ کیے ہیں۔

جان مائیکل ایگیولر نے کہا کہ یہ بات نہایت تشویشناک ہے کہ درجہ حرارت میں نسبتاً معمولی اضافے کے باوجود برفانی چادر اتنے بڑے پیمانے پر پگھل گئی تھی۔ ان کا مزید کہنا تھا کہ یہ مطالعہ ہمیں مستقبل کے بارے میں خبردار کرتا ہے کہ اگر عالمی حدت اسی طرح بڑھتی رہی تو اس کے نتائج تباہ کن ہو سکتے ہیں۔

یہ تاریخی نمونے دراصل 1960 کی دہائی میں اس وقت حاصل کیے گئے تھے جب امریکی فوج وہاں ایٹمی میزائل چھپانے کا منصوبہ بنا رہی تھی۔ پروجیکٹ آئس وورم نامی اس ناکام کوشش کے دوران کی گئی کھدائی سے ملنے والی مٹی نے آج جدید سائنسدانوں کو ایک قیمتی ریکارڈ فراہم کر دیا ہے۔

کلائمیٹ آف دی پاسٹ نامی جریدے میں شائع ہونے والی یہ تحقیق بتاتی ہے کہ عالمی حدت کے دوران درجہ حرارت کا طویل عرصے تک زیادہ رہنا کتنا خطرناک ثابت ہو سکتا ہے۔ ماہرین اب ان شواہد کی روشنی میں موجودہ برفانی تہوں کے پگھلنے کے عمل اور سمندر کی سطح میں اضافے کے خطرات کا دوبارہ اندازہ لگا رہے ہیں۔