خلیج تعاون کونسل کا کویت میں مشترکہ فوجی کمانڈ ہیڈکوارٹر قائم کرنے کا فیصلہ

منامہ: خلیج تعاون کونسل کے رکن ممالک نے کویت میں مشترکہ فوجی کمانڈ کا جدید ہیڈکوارٹر قائم کرنے اور اس کے لیے مناسب فوجی دستے مختص کرنے کی منظوری دے دی ہے۔

عرب میڈیا اور بین الاقوامی خبر رساں ادارے رائٹرز کے مطابق یہ فیصلہ 10 نومبر 2026 کو بحرین کے دارالحکومت منامہ میں منعقدہ جی سی سی کی مشترکہ دفاعی کونسل کے 23ویں اجلاس میں کیا گیا۔

جی سی سی کے سیکریٹری جنرل جاسم محمد البدیوی نے اجلاس کے بعد فیصلے کی تصدیق کرتے ہوئے کہا کہ رکن ممالک کی قیادت مشترکہ فوجی تعاون کو مضبوط بنانے اور موجودہ و مستقبل کے علاقائی چیلنجز سے نمٹنے کے لیے دفاعی تعاون میں اضافے کو اہمیت دیتی ہے۔

اجلاس میں بحرین، کویت، عمان، قطر، سعودی عرب اور متحدہ عرب امارات کے وزرائے دفاع نے شرکت کی۔ شرکاء نے مشترکہ دفاعی نظام کو مزید مؤثر بنانے اور رکن ممالک کی افواج کے درمیان رابطوں اور تعاون کو وسعت دینے سے متعلق امور پر تبادلہ خیال کیا۔

نئے فوجی کمانڈ ہیڈکوارٹر کے قیام کا مقصد مشترکہ فوجی سرگرمیوں میں رابطہ کاری اور دفاعی تعاون کو مزید مضبوط بنانا ہے۔ اس مرکز کے لیے مناسب فوجی دستے بھی مختص کیے جائیں گے، تاہم ان دستوں کی تعداد، نوعیت اور نئی کمانڈ کے عملی فرائض سے متعلق تفصیلات فوری طور پر جاری نہیں کی گئیں۔

واضح رہے کہ خلیج تعاون کونسل کی مشترکہ فوجی کمانڈ 2013 میں قائم کی گئی تھی، جس کا مرکزی ہیڈکوارٹر سعودی عرب کے دارالحکومت ریاض میں ہے۔ اس کمانڈ کا بنیادی مقصد رکن ممالک کی مسلح افواج کے درمیان تعاون، مشترکہ کارروائیوں کی منصوبہ بندی اور اجتماعی دفاعی صلاحیت کو بہتر بنانا ہے۔

یہ فیصلہ ایسے وقت میں سامنے آیا ہے جب خطے میں سیکیورٹی صورتحال، ایران اور امریکا کے درمیان کشیدگی، حوثی حملوں اور آبنائے ہرمز میں بحری آمدورفت سے متعلق خدشات کے باعث خلیجی ممالک دفاعی تعاون کو مزید مضبوط بنانے پر توجہ دے رہے ہیں۔

نئے ہیڈکوارٹر کے فعال ہونے کی تاریخ اور وہاں تعینات کیے جانے والے فوجی دستوں کی تفصیلات تاحال سامنے نہیں آئی ہیں