سیاست کا مقصد عوام کی خدمت ہے، ان پر حکمرانی کرنا نہیں: بلاول بھٹو زرداری

کراچی: چیئرمین پاکستان پیپلز پارٹی بلاول بھٹو زرداری نے کہا ہے کہ سیاست کا مقصد عوام کی خدمت کرنا ہے، ان پر حکمرانی جتانا نہیں، سیاسی جماعتوں کو باہمی محاذ آرائی کے بجائے عوامی مسائل کے حل پر توجہ دینی چاہیے۔ ان کا کہنا تھا کہ سندھ حکومت نے سیلاب متاثرین سے کیا گیا وعدہ پورا کرتے ہوئے 3 سال میں 10 لاکھ گھر تعمیر کرکے ایک تاریخی کارنامہ انجام دیا ہے۔

سندھ پیپلز ہاؤسنگ فار فلڈ ری ہیبیلیٹیشن منصوبے کے تحت 10 لاکھ گھروں کی تعمیر مکمل ہونے کی تقریب سے خطاب کرتے ہوئے بلاول بھٹو زرداری نے کہا کہ سندھ میں مکمل ہونے والا یہ منصوبہ دنیا میں اپنی نوعیت کا سب سے بڑا رہائشی منصوبہ ہے، جس کے ذریعے نہ صرف متاثرہ خاندانوں کو چھت فراہم کی گئی بلکہ انہیں گھروں کی باقاعدہ ملکیت بھی دی گئی ہے۔

انہوں نے کہا کہ پاکستان سمیت دنیا کے مختلف ممالک اس وقت معاشی مشکلات اور بے روزگاری جیسے مسائل سے دوچار ہیں، ایسے حالات میں سیلاب متاثرین کو فراہم کیے گئے یہ گھر ان کے لیے تحفظ اور معاشی استحکام کا ذریعہ بنیں گے۔ حکومت نے محض مکانات تعمیر کرنے پر اکتفا نہیں کیا بلکہ متاثرہ خاندانوں کو مالکانہ حقوق منتقل کرکے انہیں اپنی جائیداد کا مالک بھی بنایا ہے۔

پیپلز پارٹی کے چیئرمین کے مطابق اس منصوبے کی ایک اہم خصوصیت یہ ہے کہ گھروں کی ملکیت خواتین کے نام منتقل کی گئی ہے، جس کے ساتھ انہیں بینک اکاؤنٹس کی سہولت بھی فراہم کی گئی۔ ان کا کہنا تھا کہ اس اقدام کا مقصد خواتین کو معاشی اور سماجی طور پر بااختیار بنانا ہے۔ منصوبے کے ذریعے تعمیراتی سرگرمیوں کو فروغ ملا اور مقامی سطح پر روزگار کے بھی بڑے مواقع پیدا ہوئے۔

بلاول بھٹو زرداری نے کہا کہ بعض سیاسی رہنما یہ سمجھتے ہیں کہ ملک کی ترقی کے لیے صرف امیر طبقے کو معاشی سہولتیں فراہم کرنا ضروری ہے، تاہم ان کے نزدیک ترقی کا اصل راستہ غریب اور محروم طبقے کو مضبوط بنانے میں ہے۔ اگر ملکی پالیسیاں کاروباری اور خوشحال طبقے کے بجائے عام آدمی کی ضروریات کو سامنے رکھ کر بنائی جائیں تو ملک زیادہ تیزی سے ترقی کرسکتا ہے۔

انہوں نے سیاسی جماعتوں کو تنقید کا نشانہ بنائے بغیر عوامی توقعات کا حوالہ دیتے ہوئے کہا کہ لوگ سیاسی قیادت کی جانب اس امید سے دیکھ رہے ہیں کہ ان کے مسائل حل کیے جائیں گے، لیکن سیاسی جماعتیں باہمی لڑائیوں میں مصروف ہیں۔ عوام کو سیاسی کشمکش نہیں بلکہ عملی اقدامات اور ریلیف کی ضرورت ہے۔

سیلاب متاثرین کی بحالی سے متعلق گفتگو کرتے ہوئے بلاول بھٹو نے بتایا کہ سندھ اور بلوچستان کے متعدد علاقے تباہ کن سیلاب سے بری طرح متاثر ہوئے تھے۔ متاثرہ علاقوں کا فضائی جائزہ لینے کے دوران صورت حال اس قدر سنگین دکھائی دے رہی تھی کہ ہر طرف پانی ہی پانی نظر آتا تھا۔ اس وقت متاثرہ خاندانوں سے وعدہ کیا گیا تھا کہ انہیں دوبارہ گھر تعمیر کرکے دیے جائیں گے، جسے سندھ حکومت نے 3 سال کے عرصے میں 10 لاکھ مکانات مکمل کرکے پورا کردیا ہے۔

انہوں نے اعلان کیا کہ سندھ حکومت متاثرہ خاندانوں کے لیے مزید 10 لاکھ گھر تعمیر کرنے کا ارادہ رکھتی ہے، تاکہ زیادہ سے زیادہ مستحق افراد کو مستقل رہائش فراہم کی جاسکے۔

بلاول بھٹو زرداری نے سیلاب کے بعد بحالی کے کاموں میں پیش آنے والی مشکلات کا ذکر کرتے ہوئے کہا کہ اس وقت وفاقی وزرا کی جانب سے سندھ حکومت کی مخالفت کی جاتی تھی، تاہم عالمی بینک کے متعلقہ حکام نے صوبائی حکومت کی صلاحیتوں پر اعتماد کا اظہار کیا اور منصوبے میں تعاون کیا۔

ان کا کہنا تھا کہ سندھ اور بلوچستان میں سیلاب متاثرین کی بحالی کی ذمہ داریاں الگ الگ تقسیم کی گئی تھیں۔ بلوچستان میں وفاقی حکومت نے گھروں کی تعمیر کی ذمہ داری سنبھالی، جبکہ سندھ میں یہ کام صوبائی حکومت نے اپنے ذمے لیا۔ ان کے مطابق وفاقی حکومت 3 سال کے دوران بلوچستان میں 30 ہزار گھر تعمیر کرسکی، جبکہ سندھ حکومت نے اسی عرصے میں 10 لاکھ مکانات مکمل کیے۔ بلاول بھٹو نے دعویٰ کیا کہ ملک میں اس حجم کا کوئی دوسرا رہائشی منصوبہ موجود نہیں۔

چیئرمین پیپلز پارٹی نے سندھ حکومت پر ہونے والی تنقید کا جواب دیتے ہوئے کہا کہ صوبائی حکومت کو مسلسل کردار کشی کا سامنا کرنا پڑتا ہے اور مخالفین اس منصوبے پر بھی بے بنیاد الزامات عائد کرتے رہے ہیں۔ بعض سیاسی مخالفین کا کہنا تھا کہ اس منصوبے کے ذریعے مالی فائدے حاصل کرنے کی کوشش کی جارہی ہے، تاہم ان کا دعویٰ ہے کہ ہاؤسنگ منصوبے میں کسی قسم کی بدعنوانی نہیں ہوئی۔

انہوں نے وزیراعلیٰ سندھ سے کہا کہ وہ منصوبے کی شفافیت جانچنے کے لیے بدعنوانی کی نگرانی کرنے والے اداروں کو اس کی مکمل جانچ پڑتال کی دعوت دیں۔ ان کا کہنا تھا کہ انہیں منصوبے کی شفافیت پر پورا اعتماد ہے۔

تعلیم کے شعبے پر بات کرتے ہوئے بلاول بھٹو زرداری نے کہا کہ 2023 کے سیلاب نے سندھ کے تعلیمی ڈھانچے کو بھی شدید نقصان پہنچایا اور متعدد تعلیمی ادارے تباہ ہوگئے۔ صوبے کو ہر سیلاب کے بعد اسکولوں کی دوبارہ تعمیر کرنا پڑتی ہے، جس کے باعث تعلیمی ترقی کا عمل متاثر ہوتا ہے۔

ان کے مطابق سندھ میں شرح خواندگی کم ہونے اور بڑی تعداد میں بچوں کے اسکولوں سے باہر رہنے کی ایک وجہ یہ بھی ہے کہ صوبے کو بار بار قدرتی آفات کے باعث تعلیمی نظام کی تعمیر نو کے مسائل کا سامنا کرنا پڑتا ہے، جبکہ دیگر صوبوں کو اس نوعیت کی صورت حال کا سامنا نہیں کرنا پڑا۔

بلاول بھٹو زرداری نے وزیراعظم شہباز شریف کے تعاون پر ان کا شکریہ ادا کرتے ہوئے کہا کہ موجودہ وفاقی حکومت نے سندھ کے ساتھ تعاون کیا، تاہم اس سے قبل وزیراعظم رہنے والے شخص نے سیلاب متاثرین کی مدد کے لیے سندھ کو ایک روپیہ تک فراہم نہیں کیا تھا اور یہ مؤقف اختیار کیا تھا کہ سندھ ان کا صوبہ نہیں ہے۔

انہوں نے مزید بتایا کہ وزیراعظم شہباز شریف اور ان کی ٹیم کے ساتھ حالیہ ملاقات میں وفاقی اور صوبائی حکومتوں کے درمیان رابطوں اور باہمی تعاون کو مزید مؤثر بنانے پر اتفاق کیا گیا ہے۔ طے پایا ہے کہ وفاقی حکومت اپنے حصے کی ذمہ داریاں پوری کرے گی، جبکہ سندھ حکومت بھی اپنی آئینی اور انتظامی ذمہ داریاں ادا کرے گی۔

اپنے خطاب کے اختتام پر بلاول بھٹو زرداری نے کہا کہ پیپلز پارٹی عوام کی خدمت کے جذبے کے تحت سیاست کرتی ہے، اقتدار کو عوام پر حکمرانی کا ذریعہ نہیں سمجھتی۔ ان کا کہنا تھا کہ دعا ہے کہ اسلام آباد میں بیٹھے حکمران بھی عوام پر اپنی بالادستی قائم کرنے کے بجائے ان کی خدمت کو اپنی اولین ترجیح بنائیں۔