چین میں آتشزدگی سے 14 افراد جاں بحق، شہباز شریف کا صدر شی جن پنگ سے اظہارِ تعزیت

اسلام آباد : وزیراعظم شہباز شریف نے چین کے صوبے شانشی میں بلند رہائشی عمارت میں آتشزدگی کے المناک واقعے پر گہرے دکھ اور افسوس کا اظہار کرتے ہوئے چینی قیادت اور عوام کے ساتھ مکمل یکجہتی کا اعلان کیا ہے۔ وزیراعظم نے چینی صدر شی جن پنگ کے نام تعزیتی پیغام میں جاں بحق افراد کے اہل خانہ سے دلی ہمدردی کا اظہار کیا اور زخمیوں کی جلد صحت یابی کے لیے دعا کی۔

وزیراعظم ہاؤس سے جاری اعلامیے کے مطابق شہباز شریف نے حکومت اور پاکستان کے عوام کی جانب سے چینی صدر اور متاثرہ خاندانوں کے ساتھ تعزیت کا اظہار کیا، شانشی میں پیش آنے والا آتشزدگی کا واقعہ انتہائی افسوس ناک ہے، جس میں قیمتی انسانی جانوں کا ضیاع ہوا اور متعدد افراد زخمی ہوئے۔

وزیراعظم نے کہا کہ اس المناک حادثے میں جاں بحق ہونے والوں کے اہل خانہ کے غم میں برابر کے شریک ہیں۔ دکھ اور صدمے کی اس گھڑی میں پاکستان کے عوام کی ہمدردیاں چین کے عوام کے ساتھ ہیں۔

انہوں نے آتشزدگی کے واقعے میں زخمی ہونے والے افراد کی جلد اور مکمل صحت یابی کے لیے نیک تمناؤں کا اظہار کرتے ہوئے کہا کہ پاکستان مشکل کی اس گھڑی میں چین کی قیادت اور عوام کے ساتھ کھڑا ہے۔ وزیراعظم نے شانشی کے عوام اور قیادت سے بھی یکجہتی کا اظہار کیا اور متاثرہ خاندانوں کے لیے صبر و حوصلے کی دعا کی۔

دوسری جانب صدرِ مملکت نے بھی چین کے صوبے شانشی میں آتشزدگی کے واقعے پر افسوس کا اظہار کیا ہے۔ صدرِ مملکت نے چینی حکام اور متاثرہ خاندانوں سے تعزیت کرتے ہوئے جاں بحق افراد کے لواحقین کے ساتھ ہمدردی کا اظہار کیا۔

واضح رہے کہ چین کے صوبے شانشی میں اتوار کی شام ایک بلند رہائشی عمارت میں آگ لگنے کا واقعہ پیش آیا تھا، جس کے نتیجے میں 14 افراد جاں بحق اور 25 زخمی ہوگئے۔ زخمیوں میں سے 9 کی حالت تشویش ناک بتائی گئی ہے۔

واقعے کے بعد امدادی کارروائیاں کی گئیں اور زخمیوں کو طبی امداد کے لیے اسپتال منتقل کیا گیا۔ حادثے میں ہونے والے جانی نقصان پر پاکستان کی اعلیٰ قیادت کی جانب سے تعزیتی پیغامات دونوں ممالک کے درمیان دوستانہ تعلقات اور مشکل وقت میں ایک دوسرے کے ساتھ کھڑے ہونے کے عزم کی عکاسی کرتے ہیں۔