حکومت کا آئندہ انتخابات میں شفافیت کیلئے اپوزیشن کو مذاکرات کی دعوت دینے کا فیصلہ

حکومت نے آئندہ انتخابات کو شفاف اور قابلِ اعتماد بنانے کے لیے انتخابی اصلاحات پر اپوزیشن کو اعتماد میں لینے اور پارلیمانی سطح پر اتفاق رائے پیدا کرنے کی کوششیں تیز کر دی ہیں۔

پارلیمانی ذرائع کے مطابق وزیراعظم شہباز شریف نے انتخابی اصلاحات کے معاملے پر اپوزیشن کو باضابطہ مذاکرات کی دعوت دینے کا فیصلہ کیا ہے۔

ذرائع کا کہنا ہے کہ حکومت آئندہ انتخابات میں شفافیت یقینی بنانے کے لیے اپوزیشن کے ساتھ مشاورت کرے گی۔ وزیراعظم نے انتخابی اصلاحات سے متعلق پارلیمانی کمیٹی میں اپوزیشن کو شامل کرنے کی ہدایت بھی کر دی ہے۔

20 رکنی پارلیمانی کمیٹی برائے انتخابی اصلاحات میں اپوزیشن کے 5 ارکان شامل کیے جائیں گے۔ وزیراعظم نے اپوزیشن سے کمیٹی کے لیے ارکان کے نام طلب کرنے کی بھی ہدایت کی ہے۔

اس سلسلے میں اسپیکر قومی اسمبلی اپوزیشن کو کمیٹی میں شمولیت کی دعوت دینے کے لیے خط لکھیں گے اور ان سے 5 ارکان کے نام مانگیں گے۔

دوسری جانب انتخابی اصلاحات کے لیے پارلیمانی کمیٹی کی تشکیل سے متعلق بیرسٹر عقیل ملک نے سینیٹ میں قرارداد پیش کر دی۔