بینکوں میں نقد لین دین کی رپورٹنگ کی حد 20 لاکھ سے بڑھا کر 30 لاکھ کردی گئی

پاکستان میں بینکوں کے نقد لین دین کی رپورٹنگ کی حد 20 لاکھ روپے سے بڑھا کر 30 لاکھ روپے کردی گئی ہے۔

تفصیلات کے مطابق اب بینکوں کو یومیہ 30 لاکھ روپے سے زائد نقد لین دین کی رپورٹ مالیاتی نگرانی کے ادارے (ایف ایم یو) کو دینا ہوگی۔ اس سے قبل رپورٹنگ کی حد 20 لاکھ روپے مقرر تھی۔

دوسری جانب منی لانڈرنگ کی روک تھام کے لیے صوبائی انسدادِ بدعنوانی اداروں کو اختیارات دینے پر اتفاق کیا گیا ہے، تاہم اس فیصلے پر عمل درآمد معیاری طریقۂ کار کی تکمیل سے مشروط ہوگا۔

حکومت نے مجازی اثاثوں کو بھی انسدادِ منی لانڈرنگ کے نظام میں شامل کرنے کا فیصلہ کیا ہے۔

ذرائع کے مطابق مجازی اثاثہ جات کی نگران اتھارٹی کو انسدادِ منی لانڈرنگ قانون کے تحت اختیارات بھی دے دیے گئے ہیں۔