سری لنکن بولرز کے سامنے پاکستانی بیٹنگ لائن ناکام، پوری ٹیم 110 رنز پر ڈھیر

لاہور: تین ملکی کرکٹ سیریز کے پانچویں میچ میں پاکستان کی بیٹنگ لائن لڑکھڑا گئی اور قومی ٹیم سری لنکا کے خلاف 25.3 اوورز میں محض 110 رنز بناکر آؤٹ ہوگئی۔ سری لنکن بولرز نے ابتدا ہی سے پاکستانی بلے بازوں پر دباؤ برقرار رکھا اور وقفے وقفے سے وکٹیں حاصل کرکے پوری ٹیم کو بڑا مجموعہ بنانے سے روک دیا۔

قذافی اسٹیڈیم میں کھیلے جارہے مقابلے میں سری لنکا کے کپتان نے ٹاس جیت کر پہلے بولنگ کا فیصلہ کیا، جو درست ثابت ہوا۔ پاکستانی بلے باز ابتدا سے ہی مشکلات کا شکار رہے اور کوئی بھی کھلاڑی طویل اننگز کھیل کر ٹیم کو سنبھالا نہ دے سکا۔

پاکستان کو پہلا نقصان فخر زمان کی صورت میں اٹھانا پڑا، جو 5 رنز بنانے کے بعد بلے کے بیرونی کنارے سے لگی گیند پر کیچ آؤٹ ہوگئے۔ ان کے بعد معاذ صداقت بھی زیادہ دیر وکٹ پر نہ ٹھہر سکے اور 8 رنز پر فرنینڈو کی اندر آتی گیند پر ایل بی ڈبلیو ہوگئے۔

وکٹوں کے گرنے کا سلسلہ جاری رہا اور مجموعی اسکور 46 رنز تک پہنچنے پر وکٹ کیپر بلے باز سعد بیگ بھی 5 رنز بناکر پویلین لوٹ گئے۔ اس کے بعد سلمان علی آغا 9 رنز بناسکے، جبکہ بابر اعظم نے 29 رنز کے ساتھ مزاحمت کی، تاہم وہ بھی اننگز کو بڑی انفرادی کاوش میں تبدیل کرنے میں ناکام رہے۔

انگلینڈ کے خلاف عمدہ بیٹنگ کرنے والے شاداب خان سے اس میچ میں بھی اچھی کارکردگی کی توقع تھی، لیکن وہ صرف 2 رنز بناکر آؤٹ ہوگئے۔ ان کی وکٹ گرنے کے بعد پاکستان کی مشکلات مزید بڑھ گئیں اور 64 رنز کے مجموعے پر قومی ٹیم کے 6 کھلاڑی آؤٹ ہوچکے تھے۔

بعد ازاں عرفات منہاس 10 رنز بنانے کے بعد 91 کے مجموعی اسکور پر آؤٹ ہوگئے، جبکہ حسن نواز نے 17 رنز کی اننگز کھیلی۔ حارث رؤف صرف ایک رن بناسکے، شاہین آفریدی نے 15 رنز کا اضافہ کیا، جبکہ نسیم شاہ 2 رنز بناکر آؤٹ ہوئے۔

پاکستانی بیٹنگ لائن کی مسلسل ناکامی کے باعث ٹیم مقررہ 50 اوورز بھی مکمل نہ کرسکی اور 25.3 اوورز میں 110 رنز پر اس کی اننگز اختتام پذیر ہوگئی۔ سری لنکا کے خلاف اس کمزور مجموعے نے قومی ٹیم کو میچ میں مشکل صورت حال سے دوچار کردیا ہے۔