منگل، 17 نومبر، 2026 · 8 جمادی الثانی، 1448 ہجری

امریکی پالیسی ہٹلر و داعش کی پالیسیوں جیسی ہے: اسماعیل بقائی

تازہ ترین
امریکی پالیسی ہٹلر و داعش کی پالیسیوں جیسی ہے: اسماعیل بقائی

ترجمان ایرانی وزارتِ خارجہ اسماعیل بقائی---فائل فوٹو

ایرانی وزارتِ خارجہ کے ترجمان اسماعیل بقائی نے امریکی پالیسی کو ہٹلر اور داعش کی پالیسیوں سے تشبیہ دیتے ہوئے کہا ہے کہ امریکی اقدامات عالمی نظام کو کمزور کر رہے ہیں۔

اسماعیل بقائی نے امریکی وزیرِ خارجہ مارکو روبیو کے حالیہ بیان پر تشویش کا اظہار کرتے ہوئے اسے خطرے کی گھنٹی قرار دے دیا۔

مارکو روبیو نے گزشتہ ہفتے عالمی فوجداری عدالت پر تنقید کرتے ہوئے کہا تھا کہ تلواریں اٹھانے والوں کے سامنے قوانین کا حوالہ دینے کا کوئی فائدہ نہیں۔

اسماعیل بقائی نے سوشل میڈیا پر اپنے بیان میں کہا ہے کہ ایران کے خلاف جنگ کو اخلاقیات اور قومی سلامتی کے نام پر جائز قرار دیا جا رہا ہے، جبکہ یہ مؤقف اختیار کرنے والی طاقت خود کو جواب دہی سے مستثنیٰ سمجھتی ہے۔

ایران نے اپنا مؤقف اور شرائط امریکا تک پہنچا دیں: اسماعیل بقائی

انہوں نے کہا ہے کہ عالمی برادری کو یہ نہیں سمجھنا چاہیے کہ وہ اس طرزِ عمل کے نتائج سے محفوظ رہے گی۔

ایرانی وزارتِ خارجہ کے ترجمان کا کہنا ہے کہ عالمی نظام اسی وقت ٹوٹ پھوٹ کا شکار ہونا شروع ہوتا ہے جب طاقت ور ممالک اپنے لیے ایسے حقوق کا دعویٰ کرتے ہیں جنہیں وہ دوسروں کے لیے تسلیم کرنے سے انکار کرتے ہیں۔

بشکریہ روزنامہ جنگ