ٹوکیو: فکرِ اقبال پر علمی نشست، پاکستانی اور جاپانی دانشوروں کا اظہارِ خیال

جاپان کے دارالحکومت ٹوکیو میں پاکستانی سفیر عبدالحمید نے علامہ محمد اقبال کے حوالے سے منعقدہ علمی نشست سے خطاب کرتے ہوئے مصنوعی ذہانت کے دور میں فکرِ اقبال کی معنویت پر روشنی ڈالی۔

9 نومبر کو ہونے والی نشست میں پاکستانی اور جاپانی دانشوروں نے اقبال کے تصورِ انسان، روحانیت، انسانی اقدار اور علمی و ادبی ورثے پر اظہارِ خیال کیا، جبکہ تمغۂ امتیاز یافتہ پروفیسر کاتااوکا ہیرو جی نے اقبال کی انسان دوستی پر گفتگو کی۔

اوساکا یونیورسٹی کے پروفیسر ضیاء الحسن نے فکرِ اقبال اور مادی دنیا کے تعلق پر روشنی ڈالی، جبکہ اسی جامعہ کے پروفیسر سویامانے نے پنجاب میں اردو کے تاریخی ارتقا کے حوالے سے اقبال کا ادبی پس منظر بیان کیا۔

حکومت جاپان کا پاکستان کے سابق سفیر فاروق عامل کیلئے اعلیٰ اعزاز کا اعلان

ٹوکیو یونیورسٹی آف فارن اسٹڈیز کے پروفیسر عامر خان نے کلامِ اقبال میں روحانیت اور پروفیسر مامیا کینساکو نے اقبال کی علمی شخصیت کے مختلف پہلوؤں پر گفتگو کی۔

کینیڈا سے ڈاکٹر تقی عابدی نے اقبال کی شاعری میں انسانی اقدار اور اخلاقی اصولوں کی اہمیت بیان کی۔

اقبال اکیڈمی کے ڈائریکٹر پروفیسر عبدالرؤف نے اقبال کی 150ویں سالگرہ کے حوالے سے ان کے علمی ورثے پر اظہارِ خیال کیا، جبکہ کینتا اماگاوا نے اقبال اور جرمن فلسفی فریڈرک نطشے کے فکری تصورات کا جائزہ پیش کیا۔

شرکا نے اقبال پر مزید تحقیق اور پاکستان و جاپان کے درمیان علمی و ادبی تبادلوں کے فروغ پر زور دیا۔ دونوں ممالک 2027ء میں سفارتی تعلقات کے قیام کی 75ویں سالگرہ منائیں گے۔

پاکستان کے سفیر عبدالحمید نے مقررین کے متنوع نقطہ ہائے نظر کو سراہتے ہوئے کہا کہ اقبال کا فکری ورثہ آج بھی نئے علمی مباحث اور تحقیق کے لیے رہنمائی فراہم کرتا ہے۔