پاکستان نے دسمبر اور جنوری کیلئے ایل این جی کی مہنگی بولیاں مسترد کر دیں

پاکستان نے دسمبر اور جنوری میں ایل این جی سپلائی کے لیے موصول ہونے والی مہنگی بولیاں مسترد کر دیں۔

پاکستان ایل این جی لمیٹڈ (پی ایل ایل) نے دونوں مہینوں کے لیے 2 اسپاٹ ایل این جی کارگوز کی بولیاں طلب کی تھیں۔

پی ایل ایل دستاویز کے مطابق دونوں کارگوز کے لیے مجموعی طور پر 3 بولیاں موصول ہوئیں، بولیاں 14 سے 16 دسمبر اور 9 سے 11 جنوری کے دوران ترسیل کے لیے طلب کی گئی تھیں۔

ایل این جی کے 2 اسپاٹ کارگوز کی خریداری کیلئے ٹینڈر جاری

ذرائع پی ایل ایل کے مطابق دسمبر کے کارگو کے لیے 27.27 سے 31 ڈالرز فی ملین برٹش تھرمل یونٹ (ایم ایم بی ٹی یو) تک بولیاں موصول ہوئیں، جبکہ جنوری کے کارگو کے لیے صرف ایک بولی 27.01 ڈالرز فی ایم ایم بی ٹی یو کی موصول ہوئی۔

دستاویز کے مطابق دسمبر کے ایل این جی کارگو کے لیے 24 ارب 43 کروڑ سے 27 ارب 77 کروڑ روپے تک قیمت طلب کی گئی، جبکہ جنوری کے کارگو کے لیے 24 ارب 28 کروڑ روپے کی بولی موصول ہوئی۔