پارلیمانی کمیٹی تشکیل کا معاملہ طارق فضل کا عامر ڈوگر سے ٹیلیفونک رابطہ

وفاقی وزیر پارلیمانی امور طارق فضل چوہدری نے پارلیمانی کمیٹی کی تشکیل کے معاملے پر پی ٹی آئی کے چیف وہپ عامر ڈوگر کو ٹیلیفون کردیا۔

ذرائع کے مطابق ٹیلیفونک گفتگو میں طارق فضل چوہدری نے عامر ڈوگر سے پارلیمانی کمیٹی کا حصہ بننے کی درخواست کی۔

انہوں نےکہا کہ اپوزیشن اسپیکر کو پارلیمانی کمیٹی میں شمولیت کےلیے نام جلد بھجوائے۔

عامر ڈوگر نے سوال کیا کہ پارلیمانی کمیٹی کی کمپوزیشن کیا ہے؟ اس پر طارق فضل نے جواب دیا کہ نشستوں کے تناسب سے حکومت کے 15 اور اپوزیشن کے 5 ایم این اے رکن ہوں گے۔

عامر ڈوگر نےکہا کہ 2013ء میں جو انتخابی اصلاحات کمیٹی تھی اسکی تشکیل کا فارمولا مدنظر رکھا جائے۔

اُن کا کہنا تھا کہ پارلیمانی قیادت سے مشاورت کے بعد حکومت کو جواب دیں گے، انتخابی اصلاحات کمیٹی کو پہلے ہمارے انتخابات چوری ہونے کی تحقیقات کرنی چاہیے۔