سیکریٹری میٹرک بورڈ کراچی کیخلاف تحقیقات کا آغاز

عدالتی حکم پر اینٹی کرپشن نے سیکریٹری میٹرک بورڈ کراچی کے خلاف تحقیقات کا آغاز کردیا۔

اینٹی کرپشن اسٹیبلشمنٹ سندھ نے چیئرمین بورڈ کو خط لکھ دیا اور میٹرک بورڈ کراچی کے سیکریٹری کے حوالے سے ریکارڈ طلب کرلیا گیا ہے۔

اینٹی کرپشن نے خط میں کہا کہ سیکریٹری میٹرک بورڈ کے دور میں انتظامی، مالی فیصلوں کی تفصیلات فراہم کی جائے، تقرری، عہدے میں تبدیلی اور ترقی سے متعلق ریکارڈ بھی دیے جائیں۔

خط میں میٹرک بورڈ کے آڈٹ اعتراضات، آڈٹ رپورٹس اور متعلقہ دستاویزات پیش کرنےکی ہدایت کی گئی۔

حکام کے مطابق میٹرک بورڈ میں ادائیگیوں، بینک اکاؤنٹس اور بینک ٹرانسفرز کی تفصیلات بھی طلب کی ہیں۔

اینٹی کرپشن نے چیئرمین میٹرک بورڈ سے متعلقہ ریکارڈ کی تصدیق شدہ نقول طلب کی ہیں اور مطلوبہ ریکارڈ 3 دن میں فراہم کرنے کی ہدایت کی ہے۔