61 سالہ شخص کورونا ویکسین لگانے کی سنچری کے قریب

جرمنی میں ایک 61 سالہ شخص نے ایک یا دو نہیں بلکہ 90 مرتبہ کورونا وائرس ویکسین لگوالی۔ 

غیر ملکی میڈیا کی رپورٹ کے مطابق جرمنی کے علاقے میگڈبرگ سے تعلق رکھنے والے اس شخص کا نام تو سامنے نہیں آیا تاہم اس کی سنچری کے قریب کورونا ڈوز لگوانے کی وجہ سامنے آگئی۔ 

اس کے بارے میں بتایا گیا ہے کہ اس نے اپنے لیے نہیں بلکہ دوسروں کے لیے یہ کورونا وائرس ویکسین لگوائی ہیں۔ 

اس شخص نے کورونا ویکسین لگوانے کے بعد ایسے لوگوں کو اس کا سرٹیفکیٹ فروخت کیا ہے جو ویکسین لگوانے کے خواہشمند نہیں تھے۔ 

اس شخص نے ایک نہیں بلکہ مختلف ویکسینیشن سینٹرز سے یہ ڈوز لگوائیں، تاہم اس کے بارے میں یہ انکشاف اس وقت ہوا جب وہ ایلن برگ میں ایک ویکسینیشن سینٹر ویکسین کے لیے آیا۔ 

مذکورہ شخص ویکسین لگوانے کے بعد درست ویکسین بیچ نمبر کے ساتھ دوسروں کو اپنا ویکسینشن کارڈ فروخت کیا کرتا تھا۔ 

اس کے بارے میں بتایا جارہا ہے کہ اس نے کبھی کبھار ایک دن میں تین مرتبہ بھی ویکسین لگوائی ہے جبکہ یہ کوئی ایک مخصوص نہیں بلکہ مختلف کمپنیوں کی ویکسین لگواتا رہا ہے۔ 

یہ شخص اپنے نام اور تاریخ پیدائش کے ساتھ ویکسین کے لیے اپنا اندراج کرواتا لیکن کبھی بھی اپوائنٹمنٹ کے وقت ہیلتھ کارڈ نہیں دکھاتا، اور اس کے اسی اقدام نے اسے حکام کی نظروں میں مشکوک بنایا اور یہ شخص حکام کی گرفت میں آیا۔

اس شخص کو باضاطہ طور پر گرفتار تو نہیں کیا گیا تاہم اس کے خلاف جعلی کارڈز کی فروخت کے معاملے کی تحقیقات جاری ہیں۔  

خیال رہے  کہ یہ پہلا واقعہ نہیں ہے کہ کسی شخص نے ایک سے زائد مرتبہ کورونا وائرس ویکسین لگوائی ہو، اس سے قبل ایک 83 سالہ شخص 11 مرتبہ کورونا وائرس ویکسین لگواچکا تھا۔

بشکریہ جنگ