300 سال میں برطانوی معیشت کی سب سے بڑی گراوٹ، 11 فیصد سکڑ گئی

2020ء میں برطانیہ کی معیشت 300 سال میں پہلی بار بدترین گراوٹ کا شکار ہوئی، یہ تنزلی کسی بھی دوسری بڑی معیشت کے مقابلے میں سب سے زیادہ تھی۔

برطانیہ کے دفترِ قومی شماریات کے مطابق 2020ء میں ملک کی مجموعی پیداوار (جی ڈی پی) 11 فیصد کم ہوئی۔

محکمہ شماریات کا کہنا ہے کہ یہ 1709ء کے بعد سے اب تک کی سب سے بڑی تنزلی تھی۔

ان اعداد و شمار سے قبل ہی برطانیہ کی معیشت کے سکڑنے کی شرح جی 7 ممالک میں سب سے زیادہ تھی۔

سرکاری رپورٹ کے مطابق کم جی ڈی پی کی وجہ شعبہ صحت اور ریٹیلرز کی طرف سے کم ٹیکسز کی ادائیگی ہے۔

پچھلے سال نومبر میں برطانوی معیشت کورونا وائرس سے قبل کی صورتحال پر پہنچ چکی تھی۔

لیکن بینک آف انگلینڈ کا خیال ہے کہ مہنگائی میں مسلسل اضافے سے معیشت دوبارہ تنزلی کی طرف جائے گی۔

بشکریہ جنگ