25 مئی کو PTI کارکنوں پر درج مقدمات خارج کرنے کا فیصلہ

وزیر داخلہ پنجاب ہاشم ڈوگر کا کہنا ہے کہ 25 مئی کو پی ٹی آئی کارکنوں پر درج مقدمات خارج کرنے کا فیصلہ کرلیا ہے۔

ہاشم ڈوگر نے کہا کہ 25 مئی کو ہمارے کارکنوں پر جھوٹے مقدمات درج کیے گئے، محکمہ پراسیکیوشن اور پولیس کو مقدمات کی انکوائری رپورٹ پیش کرنے کا حکم دے دیا ہے۔

انہوں نے کہا کہ جن افسران نے سیاسی لوگوں کے کہنے پر جھوٹے مقدمے درج کیے ان سے جواب طلبی جاری ہے۔

ہاشم ڈوگر کا کہنا تھا کہ جھوٹے مقدمے کرانے پر فاشسٹ حکومت کے نمائندوں کے خلاف بھی قانونی کارروائی ہوگی۔

ان کا کہنا تھا کہ فاشسٹ حکومت نے پہلے پنجاب اور اب اسلام آباد میں قانون کی دھجیاں اڑائی ہیں، ن لیگ نے پنجاب اور اسلام آباد پولیس کو سیاسی مقاصد کے لیے استعمال کیا۔

صوبائی وزیر داخلہ نے کہا کہ اب گرفتاریوں کے خوف سے کاغذی شیروں کو چھپنے کی جگہ نہیں مل رہی، ہم آپ سے وہ سلوک نہیں کریں گے جو آپ ہمارے لوگوں سے کر رہے ہیں۔

بشکریہ جنگ