یہ لانگ نہیں الون مارچ ہے: ناصر حسین شاہ

وزیرِ بلدیات سندھ ناصر حسین شاہ کا پی ٹی آئی کے لانگ مارچ کو تنقید کا نشانہ بناتے ہوئے کہنا ہے کہ یہ لانگ نہیں الون مارچ ہے۔

ناصر شاہ نے سندھ کے صوبائی وزیر سعید غنی کے ہمراہ پریس کانفرنس کرتے ہوئے کہا کہ جب ادارے نیوٹرل ہو رہے ہیں تو یہ چاہتے ہیں کہ ادارے نیوٹرل نہ ہوں۔

ان کا کہنا ہے کہ یہ اداروں اور ملک کو بدنام کرتے ہیں، ڈکٹیٹرز کی اولاد اور مشرف کی ٹیم ان کے ساتھ ہے، اسی لیے مارشل لاء کا خواب دیکھتے ہیں۔

سندھ کے صوبائی وزیر، پاکستان پیپلز پارٹی کے رہنما سعید غنی کا کہنا ہے کہ عمران خان پنجاب اور کے پی اسمبلی کیوں نہیں توڑتے؟

سندھ کے وزیرِ بلدیات نے کہا کہ یہ حصولِ اقتدار کے لیے سب کچھ کر رہے ہیں، عمران خان کا ٹھکانہ اڈیالہ جیل یا پاگل خانہ ہے۔

انہوں نے مزید کہا کہ گورنر سندھ کامران ٹیسوری کے پیر پگارا سے پرانے مراسم ہیں، پیر پگارا ایک اہم شخصیت ہیں، ان سے ملنا کوئی بری بات نہیں ہے۔

وزیرِ بلدیات سندھ ناصر حسین شاہ کا یہ بھی کہنا ہے کہ پی ٹی آئی کے لانگ مارچ میں صحافی خاتون کے حادثے والے واقعے کی مذمت کرتے ہیں۔

بشکریہ جنگ