یووراج سنگھ نے کوہلی اور انوشکا پر مزاحیہ میم شیئر کردی

بھارتی کرکٹ ٹیم کے سابق آل راؤنڈر یووراج سنگھ نے بھی ویرات کوہلی اور ان کی اہلیہ انوشکا شرما کے حوالے سے ایک مزاحیہ میم شیئر کردی۔

آئی سی سی ٹی ٹوئنٹی کرکٹ ورلڈکپ 2021 میں بھارتی کرکٹ ٹیم کی مایوس کن کارکردگی کے باعث ٹیم کو سوشل میڈیا پر تنقید کا نشانہ بنایا جارہا ہے اور صارفین کی جانب سے بھارتی ٹیم پر میمز بھی بنائی جارہی ہیں۔

ایسے میں بھارتی ٹیم کے سابق کھلاڑی یووراج سنگھ نے اپنے انسٹاگرام اکاؤنٹ پر ایک میم شیئر کی ہے، جس میں ویرات کوہلی اور ان کی اہلیہ انوشکا شرما کو کچھ سوچتے ہوئے دیکھا جاسکتا ہے۔

فوٹوز اینڈ ویڈیوز شیئرنگ ایپ انسٹاگرام پر یووراج سنگھ نے ایک اسٹوری لگائی ہے، جس میں انوشکا شرما ویرات کوہلی کے خاموش بیٹھنے پر سوچتی ہیں کہ یہ ضرور دوسری لڑکیوں کے بارے میں سوچ رہے ہوں گے۔

دوسری جانب ویرات کوہلی اپنی ٹیم سے متعلق سوچتے ہوئے نظر آرہے ہیں کہ یووراج سنگھ آج بھارتی کرکٹ ٹیم میں ہوتے تو ٹیم کا مڈل آرڈر بہت مضبوط ہوتا۔

واضح رہے کہ بھارتی کرکٹ ٹیم کے سابق آل راؤنڈر یووراج سنگھ کی شاندار کارکردگی کی بدولت بھارت 2011 کا کرکٹ ورلڈکپ جیتنے میں کامیاب ہوا تھا، جبکہ اپنی شاندار بیٹنگ اور بولنگ کی بدولت مین آف دی سیریز کا ایوارڈ بھی یووراج سنگھ نے اپنے نام کیا تھا۔ 

انہوں نے ایونٹ میں 362 رنز اسکور کیے تھے جبکہ زبردست بولنگ کا مظاہرہ کرتے ہوئے 15 وکٹیں بھی حاصل کی تھیں۔

بشکریہ جنگ