ہوائی کے جنگلات میں آتشزدگی سے 6 افراد ہلاک

امریکی ریاست ہوائی کی کاؤنٹی ماؤوی کے جنگلات میں آگ لگنے سے کم ازکم 6 افراد ہلاک ہوگئے۔

غیر ملکی میڈیا رپورٹس کے مطابق ریاست ہوائی کے جنگلات میں سمندری طوفان ڈورا کے باعث چلنے والی ہواؤں کی وجہ سے پھیلنے والی آگ سے 6 افراد کے ہلاک ہونے کی اطلاعات ہیں۔

کاؤنٹی ماؤوی میں بجلی کا نظام بھی درہم برہم ہوگیا ہے، آگ لگنے کے باعث کم از کم 29 بجلی کے کھمبے گر گئے۔

میئر کاؤنٹی ماؤوی نے مزید ہلاکتوں کا خدشہ ظاہر کیا ہے، ان کا کہنا تھا کہ جنگلات میں آگ سے متعدد املاک مکمل تباہ ہوگئیں، ریسکیو آپریشن جاری ہے۔

آگ لگنے کے باعث قریبی علاقوں کو خالی کرا لیا گیا ہے، لوگوں کی نقل مکانی بھی شروع ہوگئی ہے۔

میئر کاؤنٹی ماؤوی کے مطابق ریسکیو آپریشن کے دوران فائر فائٹر ٹیم کا ایک اہلکار بھی زخمی ہوا ہے۔

ریاست ہوائی کے گورنر کا کہنا ہے کہ آگ سے ہونے والے نقصان کا مکمل اندازہ لگانے میں مہینوں لگ سکتے ہیں، امریکی کوسٹ گارڈز نے 12 افراد کو بچا لیا ہے۔

بشکریہ جنگ