ہم شہدائے جموں کو کبھی فراموش نہیں کر سکتے، چیئرمین کشمیر کونسل ای یو علی رضا سید
چیئرمین کشمیر کونسل ای یو علی رضا سید نے شہدائے جموں کو زبردست خراج عقیدت پیش کرتے ہوئے کہا ہے کہ ہم جموں کے شہداء کو جنہوں نے اپنے خون سے اپنے وطن کی آزادی کے لیے شمع روشن کی، ہرگز فراموش نہیں کرسکتے۔
یورپی ہیڈکوارٹر برسلز میں کشمیرکونسل ای یو کی کور کمیٹی کے ایک خصوصی اجلاس کی صدارت کرتے ہوئے انہوں نے کہاکہ شہدائے جموں نے اپنی جانیں پیش کرکے جموں و کشمیرکے لوگوں کی ہمت و حوصلے کو مزید مضبوط کیا۔
کور کمیٹی کا اجلاس شہدائے جموں کو خراج عقیدت پیش کرنے کے لیے کونسل کے چیئرمین علی رضا سید کی صدارت میں برسلز میں کونسل کے دفتر میں منعقد ہوا۔
علی رضا سید نے کہاکہ 6 نومبر 1947کو جموں کے شہداء سے لے کر ابتک تمام شہدائے خطہ جموں و کشمیر نے اپنے خون سے تحریک آزادی کشمیر کی آبیاری کی ہے۔
انہوں نے کہاکہ کشمیریوں کی پچہتر سال کی تاریخ قربانیوں سے بھری ہوئی ہے اور مقبوضہ کشمیرکے لوگ آج تک قربانی دے رہے ہیں۔ جن پر بھارت کے انسانیت سوز مظالم دن بدن بڑھ رہے ہیں۔
چیئرمین کشمیرکونسل ای یو نے کہاکہ تحریک آزادی کشمیر شہدا کے خون سے لکھی گئی ہے اور ہم شہدا کی تحریک کو منطقی انجام تک پہنچا کر رہیں گے۔
انہوں نے کہا کہ ہم مقبوضہ کشمیر میں بڑھتے ہوئے انسانیت سوز مظالم کو عالمی فورموں پر اٹھا رہے ہیں۔
انہوں نے کہاکہ جس طرح بے دردی سے بھارتی فورسز نے کشمیریوں کا قتل عام جاری رکھا ہوا ہے، اس کی آج کی دنیا میں کم ہی مثال دی جاسکتی ہے۔
چیئرمین کشمیر کونسل ای یو علی رضا سید نے کہاکہ ہم بھارت کے اس ظالمانہ رویے پر خاموش نہیں بیٹھیں گے بلکہ مقبوضہ کشمیر کے مظلوم عوام کو انصاف ملنے تک اپنی سفارتی کوششیں جاری رکھیں گے۔
عالمی برادری مقبوضہ کشمیر میں انسانی حقوق کی گمبھیر صورتحال کا نوٹس لے اور مسئلہ کشمیر کے پرامن حل کے لیے اپنا مؤثر کردار ادا کرے۔
Comments are closed.