ہمیں غیر ملکی کوچ نہیں رکھنے چاہئیں، عبدالرزاق

پاکستان کرکٹ ٹیم کے لیجنڈ آل راؤنڈر عبدالرزاق نے کہا ہے کہ ہمیں غیر ملکی کوچ نہیں رکھنے چاہئیں، پاکستانی ٹیم کی کپتانی بہت آسان ہے۔

جیو نیوز کے پروگرام ’ہارنا منع ہے‘ میں عبدالرزاق ، عماد وسیم اور محمد عامر نے اظہار خیال کیا۔

قومی فاسٹ بولر محمد عامر نے کہا ہے کہ ورلڈ کپ 2023ء کی بھارتی ٹیم میں کوئی کمی نظر نہیں آرہی، وہ ایونٹ میں 10 میچز جیتا ہے۔

انہوں نے کہا کہ آج کے میچ میں ایسا لگ رہا تھا کہ نیوزی لینڈ رن پورے کرلے گا، بھارت سیمی فائنل ٹاس کی وجہ سے جیتا۔

عبدالرزاق نے مزید کہا کہ بابر اعظم ہمارا نمبر ون کھلاڑی ہے، جسے ٹیم میں ویرات کوہلی کی طرح ہونا چاہیے۔

اُن کا کہنا تھا کہ پاکستانی ٹیم کی کپتانی بہت آسان ہے، مجھے اُمید ہے ان کے سر پر کپتانی نہیں چڑھے گی۔

سابق آل راؤنڈر نے یہ بھی کہا کہ ہمیں غیر ملکی کوچ نہیں رکھنے چاہئیں، پی سی بی کا چیئرمین تبدیل ہوتا ہے تو اسٹاف بھی تبدیل ہو جاتا ہے۔

اپنے متنازع بیان پر لیجنڈ آل راؤنڈر نے کہا کہ میں خود فیملی والا ہوں میں نے معذرت کی ہے، میں نے جو بات کی ایسی نہیں ہونی چاہیے تھی۔

بشکریہ جنگ