ہزارہ ایکسپریس حادثہ: 6 ریلوے افسران و ملازمین کو معطل کردیا گیا

ہزارہ ایکسپریس ٹرین حادثہ پر ریلوےحکام نے 6 افسران اور ملازمین کو معطل کردیا۔ معطل ہونے والوں میں گریڈ 18 کے 2 اور گریڈ 17 کا ایک افسر شامل ہے۔

نوٹیفکیشن کے مطابق گریڈ 18 کے معطل افسران میں ڈویژنل ایگزیکٹیو انجینئر سکھر حافظ بدرالعارفین اور ورکس منیجر ورکشاپ کراچی عاطف اشفاق شامل ہیں۔

نوابشاہ کے قریب ہزارہ ایکسپریس کو پیش آئے حادثے کے حوالے سے پٹری میں لکڑی کے جوڑ پر بحث اور تنقید زور و شور سے جاری ہے۔

اسسٹنٹ ایگزیکٹیو انجینئر نواب شاہ مشرف مجید، گریڈ 14کے پاور کنٹرولر بشیر احمد اور گریڈ 12 کے وے انسپکٹر محمد عارف کو بھی معطل کردیا گیا ہے۔

یاد رہے کہ اتوار کو کراچی سے راولپنڈی جانے والی ہزارہ ایکسپریس کی کئی بوگیاں نواب شاہ کے قریب پٹری سے اتر گئی تھیں جس کے نتیجے میں 30  سے زائد افراد جاں بحق اور متعدد زخمی ہوگئے تھے۔

بشکریہ جنگ