ہتھنی نورجہاں کی دیکھ بھال میں غفلت کے الزام پر نکالے ڈائریکٹر زو دوبارہ تعینات

کراچی کے چڑیا گھر میں ہتھنی نورجہاں کی دیکھ بھال میں غفلت کے الزام پر نکالے گئے ڈائریکٹر زو خالد ہاشمی کو دوبارہ تعینات کردیا گیا۔

کراچی میونسپل کارپوریشن (کے ایم سی) نے یکم مارچ کے بعد کی گئی تمام تقرری، پوسٹنگ اور تبادلے منسوخ کردیے۔

خالد ہاشمی سے قبل ڈائریکٹر سفاری پارک کنور ایوب ڈائریکٹر زو کے عہدے پر فائز تھے۔

ڈائریکٹر چڑیا گھر خالد ہاشمی نے جیو نیوز سے ٹیلیفونک گفتگو کرتے ہوئے کہا ہے کہ میرے تبادلے کا اپروول نہیں تھا، کچھ لوگ زبردستی ڈائریکٹر زو کے عہدے پر فائز ہو گئے تھے۔

خالد ہاشمی کا کہنا ہے کہ جو ڈائریکٹر کے عہدے پر فائز ہوئے ان کا گریڈ 11 تھا۔

دوسری جانب سابق ڈائریکٹر چڑیا گھر کنور ایوب نے کہا ہے کہ مجھ پر بے بنیاد الزامات لگائے جا رہے ہیں، بطور ڈائریکٹر زو میری تقرری کے نوٹیفکیشن پر میرا گریڈ 18 لکھا ہوا تھا۔

کنور ایوب کا کہنا ہے کہ حکومتی احکامات پر ڈائریکٹر زو کے عہدے پر فائز ہوا تھا۔

بشکریہ جنگ