ہاتھ جوڑ کر سری لنکن قوم سے معافی مانگتا ہوں: مولانا طارق جمیل

ممتاز عالمِ دین مولانا طارق جمیل کا کہنا ہے کہ ہاتھ جوڑ کر سری لنکن قوم سے معافی مانگتے ہیں۔

سیالکوٹ میں سری لنکن شہری پریانتھا کمارا پر تشدد اور انہیں قتل کرنے کے بعد جلانے کے واقعے کی مذمت اور تعزیت کے لیے وزیرِ اعظم عمران خان کے نمائندہ خصوصی برائے مذہبی ہم آہنگی، چیئرمین پاکستان علماء کونسل حافظ طاہر محمود اشرفی ممتاز عالمِ دین مولانا طارق جمیل کے ہمراہ سری لنکن ہائی کمیشن پہنچ گئے۔

اس موقع پر مولانا طارق جمیل اور حافظ طاہر اشرفی نے سری لنکن ہائی کمشنر سے ملاقات کی۔

وزیراعظم عمران خان کے نمائندہ خصوصی طاہر اشرفی نے کہا ہے کہ سیالکوٹ فیکٹری میں پریانتھا قتل کے مرکزی کردار گرفتار کرلیے ہیں۔

مولانا طارق جمیل نے سری لنکن ہائی کمشنر سے گفتگو کرتے ہوئے کہا کہ واقعے پر معذرت کرتے ہیں، ہمارا دین اس طرح کے فعل کی اجازت نہیں دیتا۔

انہوں نے کہا کہ اسلام کا نام سلامتی اور امن ہے، یہ پیغامِ محبت ہے، جو محبت کا درس دیتا ہے، سود کھانے والا اور بے گناہ کو قتل کرنے والا شدید سزا کا حق دار ہے۔

مولانا طارق جمیل نے کہا کہ ہم سری لنکن ہائی کمشنر سے معافی مانگنے آئے ہیں، قوم سے ہاتھ جوڑ کر کہتا ہوں کہ قرآن پڑھو، ورنہ جانوروں سے بھی بدتر ہو جاؤ گے۔

انہوں نے یہ بھی کہا کہ ہم سری لنکا والوں سے شرمندہ ہیں، ہمارے لوگوں نے یہ کام کیا، ہاتھ جوڑ کر سری لنکن قوم سے معافی مانگتے ہیں، اللّٰہ تعالیٰ کے سوا کسی کو یہ حق حاصل نہیں کہ کسی کو جلائے۔

اس موقع پر حافظ طاہر اشرفی نے کہا کہ سیالکوٹ میں افسوس ناک واقعہ پیش آیا، ہم سری لنکن ہائی کمشنر سے تعزیت کے لیے آئے ہیں۔

انہوں نے کہا کہ ہمارے لوگوں نے یہ کام کیا، جس پر ہم شرمندہ ہیں اور معافی مانگنے آئے ہیں، فیکٹری منیجر کے بچوں کی تعلیم اور کفالت کرے گی، فیکٹری میں دوسرا منیجر بھی سری لنکا سے لایا گیا ہے۔

حافظ طاہر اشرفی نے یہ بھی کہا کہ مارنے والوں میں اکثریت ان کی ہے جنہیں درست طریقے سے کلمہ اور نماز بھی پڑھنا نہیں آتی۔

بشکریہ جنگ