گھر پر دعوت کے دوران بھی شاہد آفریدی سرفراز کی سنچری نہ بھولے

پاکستان کرکٹ ٹیم کے چیف سلیکٹر شاہد خان آفریدی اپنے گھر پر کھلاڑیوں کے لیے کی گئی دعوت پر بھی سرفراز احمد کی نیوزی لینڈ کے خلاف سنچری کا ذکر کیے بغیر نہ رہ سکے۔

شاہد آفریدی نے دعوت کے دوران ویڈیو انٹرویو میں کہا کہ سرفراز احمد نے جو بیٹنگ کی ہے میرے خیال میں وہ بہت زبردست ہے۔

سابق کپتان نے کہا کہ  اس طرح کی ٹیم میں واپسی ہمیشہ کے لیے یادگار رہتی ہے۔

پاکستان کرکٹ ٹیم کے چیف سلیکٹر شاہد خان آفریدی نے گزشتہ روز قومی ٹیم کے کھلاڑیوں اور کوچز کی اپنے گھر پر دعوت کی۔

انہوں نے کہا کہ سرفراز احمد نے کافی سنچریاں کی ہوں گی لیکن جو سنچری انہوں نے دوسرے ٹیسٹ میچ میں اسکور کی وہ ساری زندگی کے لیے یادگار ہوگی۔

شاہد آفریدی نے یہ بھی کہا کہ میں بہت خوش ہوں کہ سرفراز احمد کو موقع ملا جس کا انہوں نے فائدہ اٹھایا۔

یاد رہے کہ گزشتہ روز شاہد خان آفریدی نے قومی ٹیم کے کھلاڑیوں اور کوچز کی اپنے گھر پر دعوت کی تھی۔

بشکریہ جنگ